Parpol tenke aprezenta programa rekuperasaun ekonómika iha Eleisaun Parlamentár 2023
DILI, 06 janeiru 2022 (TATOLI)—Prezidente Repúblika (PR), José Ramos Horta, hateten partidu polítiku (Parpol) sira tenke aprezenta programa rekuperasaun ekonómika ida di’ak iha Eleisaun Parlamentár 2023.
Notísia Relevante: PR sei dekreta kalendáriu eleisaun hafoin rona partidu polítiku sira
“Ha’u espera mak ida-ne’e eleisaun 2023 ne’e partidu sira tenke haree aprezenta programa ba tinan liman nian para estabilizasaun demokrátika, estabilizasaun polítika, konsolidasaun ne’e sempre tenke top ita-nia ajenda. Maibé tenke iha programa di’ak rekuperasaun ekonómika tanba tinan ida-ne’e 2023 situasuan mundiál sei susar tebe-tebes,” PR Horta hateten ba jornalista sira iha aeroportu internasionál Nicolau Lobato, Komoro, hafoin fila hosi Brazíl, sesta ne’e.
Tanba, nia dehan, haree ba esperiénsia tiha ona ba kotuk hosi tinan 2021-2022 problema boot mundiál ekonomia no iha 2023 bele piór liután, tanba ekonomia mundu daudaun monu loos no laiha sinál ruma rekupera hanesan folin sasán produtu konsumu ne’e sa’e no dezempregu iha mundu aumenta.
“Purtantu ita lidér sira tenke kuidadu ho ida-ne’e buka haree polítika ida-ne’ebé dinamiza ita nia ekonomia iha kontestu krize mundiál,” nia hateten.
Nune’e, nia ezije konsesu ida di’ak kampaña eleitorál mai ne’e sei foka ba programa, nune’e iha futuru labele hanesan raut malu.
“Ha’u nu’udar Prezidente tenke interven, la tolera ba ida-ne’e. Hamutuk ho CNE, sei haree, buka atensaun partidu hodi haree ba programa konkretu ba governasaun nian la’ós ko’alia kona-ba istória sé mak luta no la luta no halo atake pesoál,” nia hateten.
Tanba, tuir nia, ida-ne’e bele fó impaktu ba partidu iha eleisaun, nune’e kuidadu ho ida-ne’e tanba povu kolen ona ho atake pesoál tanba Timor-Leste iha problema sosiál sira.
Buat seluk ne’ebé urjente mak preprasaun intensifika kuadru umanu ba Timor-Leste nia adezaun ba ASEAN iha programa Governu ko’alia ba ida-ne’e rekrutamentu elementu balun pelumenus 300 iha área espesífiku hodi bele fó apoiu iha kada setór.
Xefe Estadu hateten, durante fulan-janeiru nia laran ne’e nia parte sei konvoka enkontru ho Governu, órgaun eleitorál, partidu polítiku sira hodi hala’o konsultasaun molok dekreta kaléndariu eleisaun Parlamentár iha tinan ne’e.
Notísia Relevante: Preparasaun eleisaun parlamentár 2023, Governu prevee millaun $6 ba STAE
Jornalista : Nelson de Sousa
Editór : Cancio Ximenes
