PDHJ Oé-Cusse rejista kazu violasaun boa-governasaun 11 iha 2022
OÉ-CUSSE, 06 janeiru 2023 (TATOLI) – Provedoria Direitu Umanu no Justisa (PDHJ), Delegasaun Territóriál Rejiaun Administrativa Espesiál Oé-Cusse Ambeno (RAEAOA), rejista kazu violasaun boa-governasaun 11 no violasaun direitu umanu rua durante tinan 2022.
Diretór PDHJ Oé-Cusse, Paulo Ribeiro, informa, kazu violasaun boa-governasaun ne’e akontese liga ba atendimentu públiku no lala’ok administrasaun públiku iha Oé-Cusse.
“Keixa 13 ne’e ita rejista hahú hosi janeiru to’o dezembru, ita rejista kazu barak liu mak boa-governasaun kona-bá lala’ok serbisu administrasaun públiku hanesan rekrutamentu nian, hosi kazu sira-ne’e iha mós violasaun direitu umanu rua,” Paulo Ribeiro informa liuhosi telefónika, sesta ne’e.
Nia afirma, keixa hirak-ne’ebé rejista, PDHJ simu direita hosi komunidade no entidade públiku sira, balu mai hato’o direita balu submete karta mai iha PDHJ no bele balu kontaktu liuhosi telefónika.
Entaun bainhira kazu sira-ne’e rejista, PDHJ kontinua enkamiña ba intituisaun relevante sira hodi prosesa tuir dalan legál no balu konsege hetan ona solusaun.
Tuir nia, haree ba kazu sira-ne’e aumenta kompara ho tinan 2021 ladún barak, nune’e atu prevene hodi redús.
Nune’e PDHJ sei ajenda kaléndariu atu realiza sensibilizasaun ba komunidade sira iha suku to’o aldeia no eskola sira inklui fatin públiku sira hodi bele iha koñesimentu.
Notísia relevante: PDHJ Oé-Cusse rejista kazu violasaun boa-governasaun hitu
Jornalista: Abílio Elo Nini
Editór: Evaristo Soares Martins
