Horta-Konsellu ABC ko’alia kona-ba kombate ki’ak no sub-nutrisaun
DILI, 06 janeiru 2023 (TATOLI)—Prezidente Repúblika (PR), José Ramos Horta, hasoru malu ho responsavél hosi Ajénsia Brazileira de Kooperasaun (ABC, siglá portugés) hodi ko’alia kona-ba kombate ki’ak no sub-nutrisaun.
PR Horta hateten, rekursu finanseiru mai hosi esportasaun petróleu no gás, maibé sei iha problema barak ne’ebé presiza konsellu hosi Governu Brazíl, hanesan nasaun ne’ebé iha esperiénsia ba luta kontra ki’ak, hamlaha no sai produtór mundiál ba alimentasaun.
“Ami la akonsella Governu Brazíl atu fó apoiu finanseiru, importante liu ba ami, mak konsellu tékniku ajuda iha programasaun, luta kontra pobreza, halo Timor sai país agríkula, asegura seguransa alimentár, hadi’a no halakon sub-nutrisaun infantil,” Xefe Estadu hateten liuhosi nota ne’ebé Agência Tatoli asesu, sesta ne’e.
Tarefa ne’e, tuir Xefe Estadu, konta ho tulun hosi Programa Mundiál ba Alimentasaun no UNICEF no parseiru seluk hodi atinje meta ida-ne’e ba tinan lima (5) mai.
Prezidente Repúblika kestiona prezensa hosi parseiru dezenvolvimentu iha baze, bainhira situasaun pandémika afeta hela nasaun.
“Iha Timor-Leste pandemia deklara iha marsu (2021) no iha maiu hanesan eis prezidente, líder polítiku dahuluk ne’ebé rompe serka sanitária. Ha’u la’o hale’u nasaun maibé la haree prezensa osan, la haree prezensa hosi Governu, ONG internasionál, programa hosi ONU no povu husik hela,” nia hateten.
Diretór Ajénsia Brazileira Kooperasaun (ABC), Ruy Pereira, mós aktualiza ba Xefe Estadu, implementasaun programa iha Timor-Leste ne’ebé monitoriza hosi Ministériu Agrikultura no Peska (MAP) no Programa Mundiál Alimentu (PMA).
“Projetu ne’e foin dahuluk, ami halo iha Timor-Leste (Atabae-Bobonaro), la’ós de’it ajénsia umanitária maibé atu rekonstrui kapasidade produsaun unidade ki’ik sira iha aldeia, ho formasaun téknika hosi Brazíl no programa ida-ne’e importante ba seguransa alimentár no nutrisionál, ne’ebé sai hanesan preokupasaun boot iha Timor-Leste,” nia dehan.
Prezidente Republika mós husu hanoin hosi ABC kona-ba programa merenda eskolár iha Brazíl.
Ajénsia ne’e haktuir, kustu refeisaun ba kada alunu iha Brazíl, sita ona iha Sistema Nasionál Alimentasaun no Governu Federál komplementa de’it finansiamentu ba alimentu suplementár ne’ebé munisípiu sira prepara no kada tinan orsamentu ba kategoria rekursu suplementár, totaliza real biliaun $4, ekivalente ho osan liu millaun $700.
Durante ne’e, Brazíl hetan apoiu orsamentu hosi Programa Alimentár Mundiál (PMA) iha Dili ho osan rihun $120, ba asaun kooperasaun umanitária hodi rekupera atividade subsisténsia hafoin passajen siklone iha tinan hirak liubá.
Entre tinan 2006 to’o 2016, rejista asaun hitu (7) iha asisténsia umanitária ho Timor-Leste ba Koordenasaun Jerál ba Kooperasaun Umanitária no Kombate hamlaha (CGFOME, siglá portugés) ho orsamentu liu rihun $300.
Jornalista : Nelson de Sousa
Editór : Cancio Ximenes
