DÍLI, 05 janeiru 2023 (TATOLI) – Diretora Servisu Saúde Munisípiu Díli, Agostinha Seguardo, dehan bee moos ne´ebé sai problema iha Sentru Saúde Becora, sei rezolve iha tempu badak nia-laran.
“Sentru Saúde Becora durante ne’e problema ba bee moos, hanesan dirijente ha’u anota ona hamutuk ho Autoridade Munisípiu Díli, ami atu buka solusaun iha tempu badak katak sei fura bee iha ne’eba”, Agostinha Seguardo, dehan ba jornalista sira iha Metiaut, ohin.
Servisu Saúde Munisípiu Dili iha meiu seluk mak tenke husu ba saneamentu munisípiu Dili atu ense bee semana ida dala-tolu, depende ba utilizasaun iha Sentru Saúde Becora.
“Ita halo ona liña koordenasaun ho parte sira ne’e maibé hein de´it implementasaun sira la´o tuir duni ka la´e. Se la tuir karik problema ne’e iha ne’ebé, entaun sira hato´o mai ha’u atu ha´u hadia liuhosi buka solusaun ho parte sira seluk”, refere.
Antes ne’e, Xefe Sentru Saúde Becora, Adelina Pinto, dehan durante tinan ida Sentru Saúde Becora problema ba bee moos hodi halo atendimentu iha maternidade no emerjénsia.
“Dezafiu balun ne’ebé mak ami hasoru durante tinan tomak nia-laran mak bee moos tanba ami iha ne’e asesu ba bee moos susar tebes tanba liga hamutuk ho komunidade”, Xefe Sentru Saúde Becora, Adelina Pinto ba jornalista sira.
Nia informa bee moos ne’ebé Sentru Saúde Becora utiliza iha fasilidade saúde ne’e, hetan husi bee ne’ebé husi Servisu Agua no Saneamentu (SAS) liga hamutuk ho komunidade sira nian.
“Ami utiliza hamutuk ho komunidade sira depois bee ne’e kiik no durasaun tempu ne’ebé oferese ho oras ida de´it, entaun ida ne’e la sufisiente mai ami liuliu atendimentu iha maternidade ho emerjénsia”, lamenta.
Tanba ne’e Sentru Saúde Becora husu ba ministériu relevante sira karik bele tau atensaun ba ida ne’e bainhira inan isin rua sira partus bele ajuda lalais.
“Ami nia problema ne’e hatoo ona ba Servisu Saúde Munisípiu Dili no iha ona planu no tentativa atu dada bee rasik ba ami atu labele prezudika ba servisu iha maternidade no emerjénsia nian, entaun ida ne’e sei iha prosesu nia-laran maibé tempu badak bele rezolve ami nia problema ida ne’e”, Nia afirma.
Nia esplika eletrisidade mós hanesan ligasaun direta ho parte jerál maibé iha tinan ne’e remata Ministériu Saúde apoiu jeradór ida ba Sentru Saúde Becora tanba agora daudaun iha ona prosesu instalasaun nia-laran banhira iha problema ruma ho eletrisidade sentru saúde bele utiliza ona jerador ida ne’e.
Aleinde atendimentu iha sentru saúde durante tinan tomak konsidera la´o ho diak susesu tanba atendimentu diáriu no atendimentu vasina Covid-19.
”Ita nia atendimentu durante ne’e kada loron másimu 300 ba leten no mínimu 200-resin maibé ida ne’e mós depende ba tempu liuliu diarea no ispa nian.
Durante janeiru to´o dezembru moras ne’ebé mak rejistu aas iha Sentru Saúde Becora mak Infensaun Vias Respiratóriu Aguda, (ISPA), diarea no pneumonia.
Jornalista : Felicidade Ximenes.
Editór : Zezito Silva
