DILI, 06 janeiru 2023 (TATOLI)—Prezidente Repúblika (PR), José Ramos Horta, husu Governu atu haree presu sasán aumenta ka sa’e iha merkadu.
Notísia Relevante: PN husu AIFAESA fiskaliza presu sasán iha merkadu
“Klaru Governu tenke haree ida-ne’e. Balun aumenta presu ne’e ita hatene espekulativu importadór sira sempre iha istória. Nia iha laran, iha Timor-Leste no rai sira seluk sempre aproveita. Situasaun krize aumenta presu laiha justifikasaun. Ne’eduni, primeiru tenke haree, ida ne’e aumenta presu koresponde duni ba situasaun internasionál ba kustu transporte, ne’e ezemplu. Ida-ne’e ha’u sei buka ko’alia ho Governu tenke haree tan medida seluk hodi proteje konsumidór,” PR Horta hateten ba jornalista sira iha aeroportu internasionál Nicolau Lobato, Comoro, hafoin fila hosi Brazíl, sesta ne’e.
Ramos Horta hatutan, tanba iha rai hotu sempre akontese no ida-ne’e momentu krize setór komersiál halo espekulasaun makaas la koresponde ba aumenta ne’ebé ema haree normál tanba krize mundiál hodi aumenta makaas.
“Maibé ne’e iha konsumidór nia liman. Se sira hakarak aumenta presu, ita halo sakrifísiu la konsuma. Ezemplu, Governu bele halo, iha prezidénsia ha’u sempre hateten laiha despeza ruma prezidénsia halo ho produtu ne’ebé importadu folin sa’e aas loos, la sosa. Sosa de’it mak produtu nasionál,” nia hateten.
Xefe Estadu ne’e dehan, hanesan bebida Cocacola folin sa’e ne’e sosa-na’in aproveita labele sosa, tanba produtu sira hanesan masin-midar barak iha rai sira seluk bandu tiha ona maibé Timor-Leste lae, entaun aumenta moras diabetes iha Timor-Leste.
“Purtantu, ha’u rigorozamente proibidu prezidénsia lakohi haree produtu ruma ne’ebé ita bolu asukaradu. Presu Cocacola sa’e, ha’u la interrese, bele aumenta ba ka bele halo baratu liu mós, ha’u la sosa. Nune’e, ita mak fomenta di’akliu sosa produtu lokál hanesan hudi, aidila, sabraka buat ne’ebé iha Timor-Leste bele sosa,” nia dehan.
Nune’e, Governu mós bele halo ida-ne’e proibisaun sosa produtu asukaradu bele poupa osan maibé la susfisiente, entaun Governu tenke haree liuhosi mekanizmu merkadu oinsá ajuda setór privadu nasionál ne’ebé foka ba hala’o produsaun produtu lokál hodi apoiu sira.
Notísia Relevante: Presu sasán iha Viqueque hahú sa’e
Jornalista : Nelson de Sousa
Editór : Cancio Ximenes
