BOBONARU, 21 Maiu 2026 (TATOLI) – Eletrisidade Timor-Leste (EDTL, sigla portugés) halo manutensaun ba subestasaun elétrika Mau-Mali, suku Ritabou, postu administrativu Maliana, munisípiu Bobonaru, durante semana rua, hahú husi 21 Maiu. Tanba ne’e, forsa enerjia sei la estavel maka husu komunidade atu kuidadu ho sasán elétrika.
Xefe Unidade EDTL Munisípiu Bobonaru, Mário de Jesus Soares, dehan durante manutensaun forsa enerjia elétrika sei menus, tanba junta fali enerjia husi munisípiu Likisá no Ainaru.
“Ita foti ahi ne’e ho distánsia husi munisípiu rua. Ha’u hato’o ba kliente sira ne’ebé uza mákina Tree-Feca, jeleira atu labele estraga, tanba ita-nia tengangan ne’ebé menus. Ne’e duni hotu-hotu se bele semana rua nia-laran ne’e ita dekansa ita-nia atividade hanesan Tree-Feca, mákina press batako no jeleira, nune’e labele afeta ba sasán eletróniku,”, nia informa ohin.
Tanba ne’e, durante manutensaun, distribuisaun enerjia kontinua la’o normál, maibé iha oras ida-rua, dalaruma bele akontese ahi mate, ne’ebé presiza ba ekipa tékniku halo servisu.
“Ita-nia liña ne’e ho distánsia ne’ebé dook no agora ita tama iha situasaun ida ne’ebé ke rai udan no anin”, nia salienta.
Vendedora iha merkadu Maliana, Adelina Pereira, dehan daudaun sira dezliga ona sasán eletróniku ne’ebé ho kapasidade boot.
“Ami foin lalais ne’e rona ona avizu, ne’ebé sasán hanesan ayam potong, sosis no seluk ami sei la sosa foun hatama iha jeleira laran. Sira hadi’a hotu tiha mak ami hatama fali”, nia dehan
Totál kliente EDTL Munisípiu Bobonaru hamutuk rihun 18-resin mai husi suku 50 no aldeia 193.
Jornalista: Sergio da Cruz
Editora: Maria Auxiliadora
