DILI, 06 janeiru 2023 (TATOLI)—Xefe Suku Wenunuk, postu administrativu Metinaro, munisípiu Dili, Simões Mendonça, informa iha suku Wenunuk ne’e iha xefe família 40-reisn mak seidauk simu subsídiu fim do ano subsídiu $200 ba uma kain.
“Hosi xefe família 40-resin ne’e, kompeténsia Governu nian maibé husu para hotu-hotu tenke hetan direitu ida-ne’e, nune’e iha ekilibriu ba direitu hosi subsídiu ne’e rasik,” Xefe suku ne’e hateten ba Agência Tatoli iha Metinaro, kinta ne’e.
Hosi xefe família 40-resin ne’ebé seidauk simu sira-nia direitu ne’e, autoridade lokál ne’e lori entrega no asegura fali osan hamutuk $7.600 ne’e banku.
“Tuir dadus ne’ebé mak ami haruka ba ne’e 800-resin maibé nasionál aprova de’it 748, ho nia totál orsamentu alokadu hamutuk $149,600,” nia dehan.
Suku Wenunuk iha aldeia haat hanesan Aldeia Wenunuk ho nia xefe família 315, Sahan 120, Manuleu 225 no Raimean 88 ho totál populasaun hamutuk 2.345.
Bazea ba Dekretu-Lei Nú. 37/2022, 25 maiu, ne’ebé mak hetan alterasaun hosi Dekretu Lei Nú . 82/2022, 11 novembru, katak uma kain ka benefisiáriu sira-ne’ebé mak elizivél ba programa subsídiu fim do ano mak uma kain hirak ne’ebé laiha ninia membru uma kain hetan rendimentu kafa fulan ho forma regulár $500 ka liu, nomós uma kain ne’ebé rejistu ona iha livru rejistu suku iha teritóriu nasionál to’o loron 28 fevereiru 2022.
Jornalista : Osória Marques
Editór : Cancio Ximenes
