BAUCAU , 09 janeiru 2023 (TATOLI) – Komisaun Nasionál Eleitorál (CNE, sigla portugés) munisípiu Baucau tuir planu sei realiza edukasaun sívika ba membru arte-marsiál hotu iha munisípiu Baucau.
Diretór CNE Munisípiu Baucau, Esmeraldo Damião Belo, esplika, edukasaun sívika ne’e rasik tuir ajenda sei realiza hamutuk dala-15 iha postu admistrativu neen ne’ebé tuir planu sei kolabora ho Komisaun Reguladora Arte Marsiál munisípiu Baucau nune’e bele delega membru arte marsiál hotu iha formasaun refere.
“Edukasau sívika hanesan maneira atu hasa’e koñesementu no taxa partisipasaun bele sa’e iha eleisaun parlamentár tinan ne’e,” Diretór CNE Munisípiu Baucau informa ba Agência TATOLI iha Vila Nova, segunda ne’e.
CNE Baucau hamutuk ho sub KRAM Baucau sei tarjetu kada postu partisipa hosi membru arte marsiál, estudante no komunidade sira hosi tinan-16 ba leten ho totál kada partisipante hamutuk na’in-100 iha kada fatin realizasaun edukasaun sívika.
Matéria tolu mak sei fó iha formasaun refere hanesan órgaun administrasaun eleitorál, sistema eleitorál no resentamentu eleitorál ne’ebé responsabiliza hosi Sekretariadu Tékniku Administrasaun Eleitorál (STAE).
Tuir planu sei realiza iha fulan-janeiru maibé daudaun ne’e sei hein aprovasaun orsamentu hosi nasionál nune’e posibilidade sei realiza iha fulan-fevereiru.
“Alvu ne’e ba joven sira, liuliu membru arte marsiál no estudante sira nune’e bele ajuda hasa’e koñesimentu kona-bá festa demokrasia eleisaun nian,” Esmeraldo Belo akresenta.
CNE Baucau prontu atu realiza eleisaun parlamentár tinan-2023 no sei sai fasilitadór ba edukasaun sívika ne’ebé formadór rasik mai hosi nasionál liuhosi planu estratéjiku iha CNE munisípiu no nasionál tinan-2023.
Jornalista : Natalino Belo
Editór : Evaristo Soares Martins
