Damazio Correia ema deskoñesidu sona iha Bidau Lecidere baixa iha ICU HNGV
DILI, 09 janeiru 2023(TATOLI) – Pasiente Damazio Correia Guterres ne’ebé ema deskoñesidu sona iha área Bidau Lecidere baixa iha sala Unidade kuidadu intensivu (ICU, sigla inglés), Hospitál Nasionál Guido Valadares.
Xefe Departamentu ICU, informa pasiente mane ho idade 29 sona iha 7 janeiru kalan iha Bidau Lecidere besik BJ Habibie, baixa iha ICU.
“Nia mai iha emerjénsia HNGV, médiku sira husi sirurjia halo intervensaun no halo operasaun tanba ita-bo´ot sira akompaña katak hetan sona ho tudik, entaun doutór sira halo operasaun no reviza hotu órgaun sira iha kabun laran maibé órgaun ida ne’ebé afeta mak nia pulmaun no aten”, Xefe Departamentu ICU, Vidal de Jesus Lopes, ba jornalista sira iha HNGV, ohin.
Nia dehan, médiku sira reviza katak tudik kona pulmaun oituan maibé aten mak hetan kauza maka’as ho nune’e pasiente iha ICU uza hela ventiladór mais nia komunika entre médiku ho família.
“Aban dader sei halo tan intervensaun ba daruak nian atu nune’e haree fila fali ninia órgaun sira para haree fila fali kondisaun aten nian”, pesoál saúde ne’e revela.
Iha fatin hanesan, família pasiente Fausto Correia Guterres, dehan esforsu família nia fó konfiansa tomak ba médiku sira iha ICU atu halo atendimentu di´ak, atu nune’e pasiente ne’e bele di´ak fial fali.
“Ami nia hakrak mak tulun husi médiku sira ami nia maun nia saúde bele di´ak fila fali. Tanba kazu ida ne’e ami família rasik seidauk hatene nia kronolojia loloos tanba tuir informasaun ne’ebé mak mai hetan katak nia fila husi ensaiu Berliku Fanun Rai (BFR) iha Metiaut, nia fila mai hetan sona iha dalan depois nia rasik halai mai ospitál, entaun to´o agora la iha ema ida sai sasin ba nia”, Fausto Correia konta.
Nune’e família pasiente husu tomak ba parte relavante sira hanesan, Polisia Nasionál Timor-Leste (PNTL) atu servisu ho profisionál hodi bele kaer vítima ne’ebé mak halo kanek pasiente ida ne’e.
Pasiente Damizio Correia Guterres hetan sona husi ema deskoñesidu iha Bidau Lecidere iha loron 7 janeiru 2023 tuku 21:45 kalan, husi aldeia Becusse Sentru, Suku Becora, Postu Administrativu Cristo Rei, Munisípiu Dili.
Jornalista : Felicidade Ximenes
Editór : Zezito Silva
