Edukasaun Covalima sei hato’o pedidu husu meza-kadeira ba MEJD
COVALIMA, 09 janeiru 2023 (TATOLI)—Diretór Munisipál Servisu Edukasaun Covalima, Rui Amarál Suri Seran, hateten nia parte sei hato’o pedidu husu meza no kadeira ba Ministériu Edukasaun Juventude no Desportu (MEJD) atu distribui ba eskola sira sei menus meza no kadeira.
“Foin lalais planu haruka kadeira no meza mai iha Covalima maibé eskola 11 de Março la hetan entaun ba oin iha ona planu, ita sei hato’o pedidu MEJD tanba materiál sira-ne’e hosi nasionál mak halo atendimentu,” Rui Amarál Suri Seran relata ba Agência Tatoli iha Santa Rosa, segunda ne’e.
Razaun servisu munisipál edukasaun Covalima atu hato’o pedidu ba MEJD hodi husu kadeira no meza relasiona ho diretór simu informasaun hosi diretór eskola 11 de Março iha postu administrativu Maucatar to’o loron sei menus kadeira no meza.
“Diretor eskola 11 de Março informa ona mai ha’u kona-ba estudante sira iha eskola 11 de Marsu Maucatar durante menus kadeira no meza,” nia hateten.
Antes ne’e, iha loron 26 fulan-outubru 2022 estudante sira tuir ezame nasionál períodu 2022 ho triste tanba estudante sira uza kadeira masa nakfilak ba meza hodi hakerek iha leten.
Diretór EBC 11 de Março Maucatar, Evaristo do Carmo, rekoñese eskola laiha kadeira no meza ba estudante-sira ho nune’e estudante foin lalais tuir ezame nasionál periódu 2022 estudante uza de’it kadeira masa nakfila ba meza.
Ho problema ne’e, diretór mós hato’o ona ba servisu edukasaun munisípiu Covalima maibé to’o ohin loron seidauk iha rezultadu.
Tuir dadus estudante iha 11 de Março Maucatar hamutuk na’in-55 kompostu hosi mane na’in-18 no feto na’in-30 resin.
Jornalista : Celestina Teles
Editór : Cancio Ximenes
