Eskola paralelu EGP Suai hahú loke inskrisaun ba estudante
COVALIMA, 09 janeiru 2023 (TATOLI)–Eskola Sekundáriu Jerál Públiku Suai (EGP, sigla portugés) ne’ebé estabelese eskola paralelu iha Sanfuk ne’ebé lokaliza iha postu administrativu Suai iha suku Camanasa no eskola paralelu Salele iha postu administrativu Tilomar iha suku Maudemo ne’e, hahú loke inskrisaun ba estudante foun períodu tinan 2023.
“Ohin ami hahú loke inskrisaun no reinskrisaun ba estudante sira-ne’ebé agora la’o hela tanba ba tinan ne’e ami loke eskola paralelu iha Sanfuk ho Salele no mós iha sentrál,” Diretór Eskola Sekundáriu Jerál Públiku Suai (EGP, sigla portugés), Francelino Freitas Carvalho, hateten ba jornalista sira iha ESGP Suai, segunda ne’e.
Bazea ba dadus atu simu estudante foun ba eskola paralelu rua ne’e, tuir planu, sira sei simu estudante na’in-200 no eskola sentrál sei simu estudante na’in-600 bainhira númeru estudante liu, tanba ESGP hanesan eskola públiku kontinua simu nafatin estudante sira.
Durante inskrisaun ne’e, parte ESGP sei koloka loket tolu hodi simu estudante sira no mós eskola sei koloka professor sira hodi atende.
Agora daudaun, nia dehan, eskola mós indika ona responvél ba eskola paralelu Sanfuk mak profesora Ana Vong no eskola paralelu Salele indika profesór Amaro da Cruz Lelo atu tau matan ba eskola refere.
Antes loke eskola paralelu, eskola mós koordena ona ho inan-aman, nune’e sira bele utiliza fatin hala’o prosesu aprendizajen ne’e iha fatin sira hanesan eskola paralelu Salele ne’e sei utiliza sala-de-aula EBC Salele no iha Sanfuk sei utiliza sala-de-aula EBC Sanfuk nian.
Ho nune’e, nia hatten, nia parte koloka profesór sira eskola paralelu sei fó impaktu, profesór iha eskola sekundáriu sentrál maibé eskola mós iha planu sei halo rekrutamentu ba profesór tuir nesesidade eskola nian.
Reprzentante inan-aman hosi estudante, António Carvalho de Araújo, aseita polítika autoridade Covalima ne’ebé loke eskola paralelu rua iha munisípiu Covalima hodi lori eskola hakbesik ba komunidade.
“Ami nu’udar inan-aman aseita loke eskola paralelu iha munisípiu covalima, maibé haree ba kualidade eskola ida-ne’e depende ba estudante sira mós la gasta ona osan ba transporte,” nia hateten.
Loke eskola paralelu ne’e, nia dehan, nu’udar inan-aman apoiu tebes tanba lori eskola hakbesik ba iha komunidade, nune’e povu nia oan sira bele asesu edukasaun tanba ne’e bainhira eskola foti desizaun husu inan-aman apoiu atu halo kontribuisaun.
Prosesu inskrisaun no reinskrisaun ne’ebé hahú iha segunda (09/01/2023) ne’ebé sei termina iha sábadu (14 /01/2023) ne’e sei hahú tuku 08h00 dadeer to’o tuku 17h00 lorokraik.
Jornalista : Celestina Teles
Editór : Cancio Ximenes
