OÉ-CUSSE, 09 janeiru 2023 (TATOLI) – Diretór Autoridade Aduaneiru (AA/Alfándega), Rejiaun Administrativa Espesiál Oé-Cusse Ambeno (RAEOA), José da Costa, informa, durante tinan 2022 Alfándega konsege rekolla reseita mai hosi importasaun ba kofre Estadu hamutuk $239,152.25.
José da Costa informa, ha trimestre dahuluk janeiru to’o marsu rekolla $46.782,50, trimestre daruak abril to’o juñu $48.212,75, trimestre datoluk hosi jullu to’o setembru hamutuk $55.427,75 iha trimestre dahaat hosi outubru to’o dezembru hamutuk $88.729,25.
“Taxa sira-ne’e ita hetan barakliu mai hosi sasán importasaun de’it, hanesan nesesidade bázika konstrusaun sivíl, ba portu no aeroportu ladún iha,” José da Costa hatete iha Oé-Cusse, segunda ne’e.
Nia fundamenta, taxa ne’e la inklui portu no aeroportu, só importasaun liuhosi fronteira terrestre odamatan ida de’it liuhosi fronteira Sakato, ba fronteira Oésilo, Pássabe no Nítibe dezde COVID-19 la ativa tanba kondisaun dalan.
“Uluk seidauk COVID-19 kada tinan iha hetan millaun $1-resin, hafoin situasaun COVID-19 afeta ba buat hotu-hotu, iha 2021 ita-nia reseita monu kuaze pursentu 80, maibé ita fiar katak, iha futuru taxa sei sa’e maka’as, iha-ne’e só tabaku laiha autorizasaun, kuandu hahán no nesesidade báziku seluk bele, no sasán eletrónika, inklui konstrusaun nian,” nia afirma
Totál funsionáriu ne’ebé serbisu iha Autoridade Aduaneiru RAEOA hamutuk ema na’in-43, na’in-sia (9) permanente no kontratadu na’in-34.
Notísia relevante: https://tatoli.tl/2021/06/16/serka-sanitaria-reseita-autoridade-aduaneira-raeoa-menus-kuaze-80/
Jornalista : Abílio Elo Nini
Editór : Evaristo Soares Martins
