VIQUEQUE, 09 janeiru 2023 (TATOLI)–Programa Nasionál Dezenvolvimentu Suku (PNDS) munisípiu Viqueque, distribui ona kalen ba uma-kain 37, ne’ebé sai benefisiáriu ba programa Uma Naroman ba Povu (UNP) iha suku Macadique, postu Uatulari, munisípiu Viqueque.
“Ohin ami halo distribuisaun materiál ba programa Uma Naroman ba Povu, agora ita la bolu ona Uma Kbiit Laek tanba ita iha alterasaun lei hodi muda naran ba Uma Naroman ba Povu ne’ebé vigór iha loron 01 janeiru 2023. Nune’e suku Macadique, postu Uatulari nia benefisiáriu uma-kain 37 mak simu ona kalen,” Diretór programa PNDS, Higinio Posinato Zamor e Silva, hateten ba Agência Tatoli, iha sede suku Macadique, segunda ne’e.
Notísia relevante: Materiál konstrusaun tarde UKL Suku Ulmera seidauk konklui
Planu VIII Governu mak fó apoiu másimu ba povu Timor-Leste, tanba ne’e ezekutivu kontinua tau perioridade ba nia populasaun sira.
“Governu tenke tau-matan ba povu nia saúde no hela fatin, maka Governu kria uma ba povu. Tanba ne’e Governu kria programa sira-ne’e ba povu hotu. Agora Governu liuhosi Ministériu Administrasaun Estatál (MAE) liuhosi PNDS kria programa koletivu halo sede suku, sede aldeia, dalan kiik sira iha suku laran, postu saúde, inklui dada bee. Iha tinan 2021 maka Governu kria fali uma ba povu hodi uza,” nia akresenta.
Iha postu Uatulari, benefisiáriu ba UNP +B iha uma-kain 222, enkuantu distribuisaun kalen ba postu Viqueque Vila ba suku 10, ho totál benefisiáriu 370 mak simu ona.
Iha serimónia lansamentu distribuisaun kalen, Administradór postu Uatulari, Manuel do Rosário, husu ba benefisiáriu UNP +B hosi Macadique ne’ebé simu ona kalen atu aselera halo uma.
“Kalen ne’ebé imi simu hodi troka kalen sira ne’ebé a’at ona, nune’e bainhira simu tenke taka lais imi-nia uma. Labele rai de’it iha uma, semana ida ka rua tenke taka tanba ekipa PNDS no funsionáriu postu sei ba halo kontrolu,” nia hameno.
Nune’e mós, Xefe suku Macadique, Afonso dos Reis, agradese ba VIII Governu ne’ebé apoiu kalen ba povu hodi hadi’a uma.
“Agradese ba Governu hodi kontinua apoia povu liuhosi distribuisaun kalen hodi hadi’a ita-nia povu nia uma ne’ebé a’at ona. Suku Macadique iha aldeia 21, maibé iha aldeia 10 maka simu kalen, enkuantu aldeia 11 seluk hetan UNP +A no UNP regular, tanba ne’e aldeia 11 la hetan kalen,” nia hato’o.
Benefísiariu UNP +B hosi suku Macadique, Maria E. da Silva Carvalho, agradese no kontente tanba simu ona kalen tanba ninia kalen ferujen ona.
“Ho planu Governu bele hadi’a filafali uma ho kondisaun a’at. Ha’u sente programa Governu ne’e bele fó susesu ba povu nia moris. Ida-ne’e ha’u hakarak husu nafatin ba Governu hodi kontinua implementa programa sira-ne’e tanba ita haree hahú hadi’a povu nia kondisaun. Tanba ne’e, presiza kontinua hodi maluk sira ne’ebé seidauk hetan mós bele hetan filafali tanba sira mós sidadaun timor-oan hotu,” nia akresenta.
Serimónia distribuisaun ne’e hetan partisipa hosi Autoridade lokál, veteranu, komunidade no benefisiáriu sira iha suku Macadique.
Jornalista : Vitorino Lopes da Costa
Editora : Julia Chatarina
