Somotxo husu PNTL intensifika operasaun iha tempu kalan

DILI, 09 janeiru 2023 (TATOLI)—Prezidente Komisaun B trata asuntu Negósiu no Estranjeiru ho Defeza no Seguransa iha Parlamentu Nasionál (PN), José Agostinho Sequeira ‘Somotxo’, husu komandu Polísia Nasionál Timor-Leste (PNTL) atu intensifika operasaun iha kapitál Dili iha tempu kalan, relasiona ho situasaun mosu kazu ema sona no oho malu.

“Preokupa situasaun atuál sente triste hafoin pasa tinan tuan ba tinan foun 2023, hanesan situasaun atuál akompaña desde 01 janeiru mai, ita simu ida mate. Tanba ne’e, ita hanoin katak situasaun ne’e para ona maibé loron sira tuir mai agora ida iha Elemloi, ponte Habibie, la hatene iha fatin munisípiu balun mós timoroan hira mak mate ona. Nune’e husu autoridade seguransa foti medida seguransa iha kalan ne’e tenke apertadu uitoan hodi halo medida tenke rigor uitoan,” Prezidente komisaun B ne’e hateten ba jornalista sira iha PN, segunda ne’e.
Kazu oho malu ida-ne’e viola direitu umanu ema seluk nian hodi hakotu nia vida, nuene’e autoridade Estadu tomak hotu hanesan defeza no seguransa halo analiza ba serbisu nasionál intelejénsia, serbisu informasaun intelejénsia militár, serbisu intelejénsia polísia nian, serbisu investigasaun kriminál polítisia, Polísia Sientífika Investigasaun Kriminál (PCIC, siglá portugés).
“Sira-ne’e tenke funsiona. Ko’alia kona-ba mákina Estadu ba área defeza no seguransa kombate kriminalidade iha ita-nia rain. Alerta mós ba autoridade responsabilidade defeza no seguransa, situasaun ne’e la’ós normal. Ema sira-ne’ebé hanesan halo asaun oho sira hanesan grupu organizadu atu oho de’it ema tanba ita haree imajen (video CCTV) iha Elemloi, Habibie la’ós ódiu malu maibé to’o mai, nia koñese ka lae, sona no oho daudaun,” nia dehan.
Tuir nia. hosi imajen ne’e hanesan krime organizadu, nune’e presiza investigasaun hodi buka hatene klean liután.
“Primeiru, ita dehan ne’e grupu organizadu iha ita-nia rain la’ós ema normál ne’e to’o ho to’o, tuur iha dalan direta sona no oho, tan ne’e autoridade tenke analiza. Situasaun ne’e la seguru, mai ita, primeiru polísia tenke re-analiza fali situasaun hodi halo medida prevensaun seguransa hodi fó konfiansa ba ita-nia populasaun sira sente seguru,” nia dehan.
Nune’e, nia apela ba komunidade tomak atu kuidadu an no bele servisu hamutuk ho autoridade seguransa no defeza.
“Apelu ba komunidade tomak ho kuidadu, tanba haree ba imajen ne’ebé iha, ohin loron ita la’ós ódiu malu, hatene katak ha’u diskute malu ho ema ne’e bele persege ha’u no oho ha’u. Maibé agora la’ós ita bele la’o iha supermerkadu ka merkadu, iha fatin seluk ema to’o bele sona no oho ita. Ida-ne’e mak apela ba komunidade kuidadu,” nia apela.
Jornalista : Nelson de Sousa
Editór : Cancio Ximenes

