DILI, 09 janeiru 2023 (TATOLI)–Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten eleisaun parlamentar iha tinan 2023 ne’e STAE sei estabelese sentru paralelu no sei la envolve parte relevante sira hanesan akontese eleisaun prezidensiál 2022.
Tanba sentru paralelu funsiona iha parte sira balun ne’ebé kontinua tau iha kestaun barak liu, tanba burokrasia mak halo naruk, nune’e ema rejisu naran iha maibé ikus mai naran la sai iha sistema STAE nian.
“Entaun ida-ne’e mak ita konsidera no hodi tau iha proposta ho nia mekanizmu ne’ebé mak naruk maibé uluk ne’e liuhosi entidade relevante sira maibé agora lae, direta ho STAE. Agora ne’e la liuhosi suku, edukasaun, universidade no sei la liuhosi komisaun funsaun públiku, direta ho STAE. Entaun STAE bele hatene ona katak sidadaun ida-ne’e mai rejistu duni ka lae, no ida-ne’e komprova direta hosi baze dadus no sei habadak burokrasia sira,” nia dehan ba Agência Tatoli, iha nia kna’ar fatin Caicoli, segunda ne’e.
Espera katak ho ida-ne’e bele fó ona solusaun ba preokupasaun públiku nian kona-ba funsionamentu sentru paralelu rasik.
“Parese sei aumenta nia númeru rasik tanba ita habadak ona nia burokrasia. Maibé kona-ba rai-li’ur nian ita sei konsulta ho parte relevante liu-liu embaixada sira atu rona took nia mekanizmu funsionamentu iha ne’ebá,” nia dehan.
Jornalista : Osoria Marques
Editór : Cancio Ximenes
