BAUCAU, 09 janeiru 2023 (TATOLI) – Servisu Munisipál Protesaun Sívil no Dezastre Naturál iha Baucau, rejista uma-kain hamutuk 56 hetan estragu tanba kauza hosi anin boot.
Diretór Serbisu Munisipál protesaun Sivíl no Dezastre Naturál, Nelson Nunes, esplika, uma hirak-ne’e hetan estragu kauza hosi anin boot akompaña udan, hahú hosi loron 30 dezembru 2022 to’o 03 janeiru 2023.
“Dadus ne’e sei provizóriu, posibilidade aumenta ka bele menus, ida-ne’ebé tama kritériu ami sei apoia emerjénsia no submete ba nasionál atu kontinua hetan apoia rekuperasaun,” Diretór Servisu Munisipál Protesaun Sívil no Dezastre Naturál informa ba Agência TATOLI iha Vila Nova, segunda ne’e.
Vítima sira mai hosi postu admistrativu haat hanesan Baucau Vila hamutuk 11 no uma-lima mak hetan estragus natoon, Venilale hamutuk 25 no uma-lima mak prienxe kritéria estragu natoon laga hitu no Baguia hamutuk 13.
Protesaun sivíl no dezastre naturál apoia ona emerjénsia ba vítima uma-kain lima hosi postu admistrativu Baucau Vila no uma rua iha Venilale no uma-kain seluk sei hetan apoia iha tempu badak.
Dadus hirak-ne’e sei provizóriu tanba postu administrativu rua seluk hanesan Vemasse no Quelicai seidauk submete informasaun no dadus loloos inklui protesaun sivíl no dezastre naturál Baucau sei kontinua verifika hodi hatene loloos uma hirak-ne’e tuir kategoria estragu.
Hafoin verifikasaun mak sei deside uma ne’ebé prienxe kritéria hetan estragu sei kontinua hetan apoia rekuperasaun hanesan matéria konstrusaun no osan mão de obra no ne’ebé la prienxe parte autoridade sei kontinua fahe hahán no ekipamentu dapur.
Protesaun sivíl no dezastre naturál Baucau kontinua serbisu hamutuk ho parseiru sira hanesan Cruz Vermelha Timor-Leste (CVTL), CRS no Caritas Dioseze Baucau hodi kontinua identifika no apoia sosiál ba komunidade sira iha Baucau ne’ebé hetan dezastre naturál kauza hosi klima.
“Bainhira ami-nia kbiit lato’o sempre husu ajuda parseiru sira atu ajuda, liuliu iha transporte hodi halo verifikasaun dadus,” Nelson Nunes informa.
Jornalista : Natalino Belo
Editór : Evaristo Soares Martins
