BAUCAU , 09 janeiru 2023 (TATOLI) – Parseiru dezenvolvimentu United Nations Development Programme (UNDP) apoia konstrui edifísiu foun Komisaun Nasionál Eleitorál (CNE, sigla portugés) iha munisípiu Baucau.
Diretór CNE Munisípiu Baucau, Esmeraldo Damião Belo, esplika, edifísiu foun ne’e hahú konstrui iha loron-15 dezembru 2022 liuhosi apoia orsamentu hosi UNDP ho totál rihun $120 ne’ebé responsabiliza hosi kompañia lokál warfour all unipesoál Lda.
“Fasilita tebes CNE Baucau atu halo serbisu liuliu hasoru eleisaun parlamentár,” Diretór CNE munisípiu Baucau informa ba Agência TATOLI iha Vila Nova, segunda ne’e.
Durante ne’e CNE Baucau hasoru difikuldade iha edifísiu tanba kondisaun uma tempu okupasaun Indonézia no kloot nune’e bainhira hasoru eleisaun sempre difikuldade funsionáriu no rekrutamentu ofisiál supervizaun sira atu halo serbisu fatin sufisiente.
Tuir planu edifísiu tuan sei sobu maibe tanba kondisaun iklima no funsionáriu sira fatin laiha atu halo serbisu nune’e parte rua konkorda atu mantein edifísiu tuan hodi halo serbisu preparativu relasiona ho eleisaun parlamentár.
“Ita espera edifísiu ne’e bele finaliza ona molok realiza eleisaun parlamentár mai,” Esmeraldo Belo akresenta.
Durasaun kontratu ba konstrusaun edifísiu ne’e durante fulan-neen ne’ebé tuir dezeñu sei iha sala aula ba dirijente, xefe departamentu, funsionáriu, ofisiál administrativu, ofisiál supervizaun, sala lojístika ne’ebé fasilidade ba ema ho defisiénsia.
Jornalista : Natalino Belo
Editór : Evaristo Soares Martins
