DILI, 09 janeiru 2023 (TATOLI)—Xefe suku Wenunuk, postu administrativu Metinaro, Munisípiu Dili, Simões Mendonça, hateten implementasaun programa Uma Kbiit Laek (UKL), ne’e. iha suku Wenunuk ne’e xefe famíli hamutuk xefe família 12 mak asesu.
“Ha’u-nia suku rasik, UKL ne’e iha xefe família 12 hetan maibé hosi uma 12 ne’e ita konklui hotu ona uma tolu (3) no hela uma sia (9) mak iha hela prosesu konstrusaun nia-laran,” Xefe suku ne’e hateten Agência Tatoli, liuhosi telefónika, segunda ne’e.
Líder komunitária ne’e hatutan, tempu badak bele konklui no entrega ba nia na’in hodi uza tanba daudaun ne’e sei iha faze konstrusaun nia-laran.
Aleinde UKL regulár, nia esplika Governu liuhosi Ministériu Administrasaun Estatál (MAE) iha Programa Nasionál Dezenvolvimentu Suku (PNDS) mós apoiu zinku ba xefe família hamutuk 37 ne’ebé sira-nia uma kakuluk aat ka ferujin ona.
“Agora iha hela prosesu identifikasaun no monitorizasaun ba uma komunidade nian ne’ebé indentifikadu ona,” nia dehan.
UKL faze dahuluk Governu aloka osan miliaun $25 ba uma 1.254 iha territóriu nasionál, no faze daruak ba tinan 2022 Governu aumenta uma 4.000 ba família kbiit laek no vulnerável.
Governu liuhosi Ministériu Finansa aloka orsamentu besik millaun $8 atu kontinua programa refere maibé id-ne’e la to’o atu hala’o iha suku hotu-hotu tanba redusaun 75% hosi orsamentu ne’ebé aloka iha tinan 2022.
Nune’e, deputadu sira propoin tan osan hamutuk $63,600.000 hodi MAE liuhosi PNDS bele implementa Uma Kbiit Laek iha 2022, atu aumenta uma 10 kada suku.
Depois Governu mós planu programa Uma Kbiit Laek Pluz ba ema kbiit ho osan alokadu hamutuk millaun $25.
Jornalista : Osoria Marques
Editór : Cancio Ximenes
