DILI, 09 janeiru 2023 (TATOLI) – Prezidente Federasaun Taekwondo Timor-Leste (FTTL), Gabriel da Costa, informa selesaun ba atleta hamutuk nain-haat preparadu atu ba kompete iha eventu rejionál SEA Games Kamboja 2023.
“Ami hala´o ona selesaun ikus ba ami nia atleta iha ami nia fatin traning centre, deside atleta ne’ebé mak merese atu ba partisipa iha eventu ne’e, molok ami halo selesaun mós antes ne’e sira halo preparasaun másimu tebes ona, ne’ebé ami deside ona atleta na’in haat”, dehan Gabriela da Costa ba Agência TATOLI, iha Mandarin, segunda ne’e.
Atleta na’in haat ne’e mak hanesan, Teresa Semio do Rego Cruz Lein, joga iha under-49, Ana da Costa, joga iha under-46, José da Sosta, joga iha under-54 no Cerilio do Rego Cruz Lein joga iha under-58.
“Ami halo uluk selesaun ba sira na’in haat tanba tuir desizaun ne’ebé Governu fó sai ona liuhosi Sekretariu Estadu Juventude no Desportu (SEJD) katak atleta na’in haat de’it mak bele ba maibé ami sei buka meiu atu aumenta tan ami nia atleta hodi ba partisipa iha eventu ne’e, kada tinan atu ba tuir eventu internasionál sira ami Taekwondo hamutuk ema na’in 10, feto lima mane lima, maibé ida agora ne’e muda fali ami sei buka meiu atu aumenta tan númeru atleta, sé Governu nafatin mantein ami labele halo buat ida prontu koopera”, dehan lideransa FTTL ne’e.
Ho nune’e, prezdente FTTL optimista katak ho preparasaun másimu tebes iha eventu ne’e, Taekwondo sei hatudu prestasaun ne’ebé di’ak hodi lori rezultadu di’ak ba rai doben Timor-Leste.
Jornalista:Hortencio Sanchez
Editór : Zezito Silva
