DILI, 10 janeiru 2023 (TATOLI)—Prezidente Repúblika (PR), José Ramos Horta, tersa ne’e, simu audiénsia Embaixadór Japaun iha Timor-Leste, Kimura Tetsuya, hodi relata atu haruka traballadór timoroan ba servisu iha Japaun.
“Prezidente kontente simu ha’u no ha’u-nia delegasaun hosi Japaun nian, ko’alia kona-ba oinsá atu promove servisu traballadór sira ba iha programa estájiu ninian ne’ebé bolu programa formasaun estájiu hodi haruka traballadr timoroan servisu iha Japaun,” Embaixadór Kimura Tetsuya hateten ba jornalista sira hafoin enkontru hpo Xefe estadu iha Palásiu Prezidensiál, Bairru Pite,
Programa ne’e ho nia objetivu fó servisu ba juventude sira la’os de’it atu hetan osan maibé sira mós hetan koñesimentu no abilidade iha Japaun liu-liu teknolójia oinsá sira fila-fali mai dezenvolve Timor-Leste.
Governu Japaun ho Governu Timor-Leste iha inísiu diskusaun ba memorandu kooperasaun ninian komunikasaun la’o hela.
“Maibé komunikasaun la’o hela entre Governu rua no ita mós hetan vizita hosi kompañia sira hanesan agora iha kotuk ne’e iha Japaun mak hakarak vizita mai iha ne’e, hakarak halo programa pilotu ida harii ho númeru ki’ik no sira sei diskute teknikamente hamutuk ho SEFOPE,” nia dehan.
Nia hein katak tempu besik bele iha akordu ida bele finaliza sai nu’udar baze atu haruka estajiádu sira ba servisu iha Japaun.
“Ami informa ida-ne’e ba Prezidente no Prezidente Repúblika sente kontente tebes no apoiu tebes programa ne’e, tanba bele ajuda nasaun rua entre Timor-Leste no Japaun bainhira indústria Japaun presiza ema, ita Timor-Leste mós fornese tan traballadór ba Japaun,” nia dehan.
Nune’e, nia parte sei servisu hamutuk ho SEFOPE no entidade seluk hodi realiza ida-ne’e di’ak liután.
Embaixadór ne’e esplika kona-ba rekezitu sira, daudaun ne’e asosiasaun kooperativa hasoru tiha ona ema na’in-lima, ne’ebé daudaun ne’e tuir kursu hela lian Japaun iha sentru formasaun hodi mobiliza ba Japaun.
Ba tempu tuir mai, rekezitu ida importante tebes mak lian Japaun presiza iha koñesimentu no abilidade nune’e sei servisu hamutuk ho SEFOPE oinsá estabelese formasaun lian Japaun hodi timoroan sira bele apreende.
Jornalista : Nelson de Sousa
Editór : Cancio Ximenes
