DILI, 10 janeiru 2023 (TATOLI)–Diretór Eskola Sekundária Jerál 4 Setembru Balide, Martinho de Menezes, informa estrutura Ensinu Sekundáriu Jerál (ESG, sigla portugés) 4 Setembru UNAMET Balide, iha tinan ida-ne’e simu estudante 80-resin hosi munisípiu bazea ba rekomendasaun hosi dirasaun servisu edukasaun Dili.
Tinan ida-ne’e, nia hateten, tinan ida-ne’e sira redús númeru estudante hosi 1.360 ne’ebé finaliza ona sira-nia Estudu iha anu letivu 2022 ne’e tun ba 1.100-resin no hosi totál estudante ne’e inklui mós iha estudante 80-resin hosi munisípiu.
“Bazea ba karta sirkulár Ministru Edukasaun nian katak bandu ona eskola sira iha Dili labele simu estudante hosi kada munisípiu mai eskola iha Dili. Maibé liuhosi karta rekomendasaun DSEMD nian, ohin, iha estudante 80-resin mak halo inskrisaun iha eskola 4 Setembru Balide,” Martinho Menezes hateten ba Agência Tatoli iha ninia kna’ar fatin eskola ESG 4 Setembru Balide, tersa ne’e.
Tuir nia, estudante 80-resin hosi munisipiu antes ne’e mai hasoru ona nia atu halo inskrisaun maibé nia la fó autorizaun tanba lakohi foti risku hodi kontra sirkulár ne’ebé hasai ona hosi MEJD.
Tanba ne’e, nia dehan, ninia parte orienta estudante sira-ne’e direta ba hasoru diretór edukasaun munisipiu Dili.
Maibé liu hosi rekomendasaun no lista koletivu ida hosi Munisípiu Dili nian dirije mai Diretór hodi husu atu rejista estudante sira-ne’e iha eskola 4 Setembru Balide hanesan estudante foun, no ho rekomendasaun ne’e eskola rasik tenke simu no hahú halo ona prosesu inskrisaun ba estudante sira-ne’e.
“Ami simu ona lista ida koletivu ida hosi DSEMD nian, ohin haruka ona mai ami kuaze estudante hosi Munisípiu liu 80 mak sei tama iha 4 Setembru, ho nune’e ami nia estudante hamutuk 1.100-resin,” nia dehan.
Ho nune’e, estudante foun na’in-1.100-resin ne’ebé rejista ona iha obrigasaun tenke partisipa iha atividade orientasaun eskolár ne’ebé mak eskola 4 Setembru UNAMET Balide realiza ona durante loron tolu, hahú hosi 09-11 janeiru 2023.
Atividade orientasaun eskolár ne’e, eskola realiza ba estudante foun sira ho intensaun atu lori estudante sira bele koñese ambiente eskola nian.
“Ita orienta ona estudante sira iha konsellu estudantíl atu organiza estudante foun sira hodi bele adota situasaun sira iha área eskola ne’e, atu nune’e ba futuru kuandu sai estudante iha eskola 4 Setembru karik, saida mak sira bele halo no saida mak sira labele halo,” nia hateten.
Atividade orientasaun eskolár iha lron dahuluk ne’e, mestre sira mak fó formasaun ba estudante foun sira relasiona ho dezenvolvimentu edukasaun inklui atividade sira-ne’ebé halo iha eskola 4 Setembru, depois iha loron daruak ne’e parte Polisia Nasionál Timor-Leste (PNTL) mak fó formasaun.
“Hosi komandu Polisia Munisípiu Dili fo formasaun kona-ba violasaun direitu umanu, konflitu ne’ebé akontese iha nasaun ne’e, inklui partisipasaun joven ninia iha dezenvolvimentu. Formasaun ida-ne’e oinsá atu motiva joven sira liu-liu estudante foun sira iha Eskola 4 Setembru ne’e bele hakribit violénsia hodi hadook an hosi konflitu sira,” nia dehan.
Iha orientasaun ba loron datoluk ne’e, tuir planu sei partisipa hosi CAC, KRAM no parte Igreja nian atu fahe liután informasaun sira ba jerasaun foun iha eskola 4 Stemebru UNAMET Balide, Dili.
Jornalista : Tomé Amado
Editór : Cancio Ximenes
