OÉ-CUSSE, 10 janeiru 2023 (TATOLI) – Diretór Servisu Rejistu Sivíl Notariádu iha Rejiaun Administrativa Espesiál Oé-Cusse Ambeno (RAEOA), José Ase Neno Kolo, informa, iha tinan 2022 hosi janeiru to’o dezembru konsege rekolla reseita ba kofre Estadu hamutuk $54,550.00 hosi tratamentu pasaporte.
“Reseita ne’e rekolla liuhosi tartamentu pasaporte komún no pasaporte servisu, no mós balu hasai pasaporte ne’e depende sira-nia nesesidade, balu hasai ho kategoria normál ba loron 10 sei selu $50,00, balu hasai loron tolu (3) nian selu $75,00 no balu hasai loron ida nian selu $100,00 kada pasaporte,” José Ase Neno Kolo, hateten iha Oé-Cusse, tersa ne’e.
Nia informa, hosi reseita ne’e iha trimestre dahuluk ka janeiru to’o marsu rekolla $4,250,00 trimestre daruak abríl to’o juñu rekolla $13,100,00.
Nune’e iha trimestre datoluk ka jullu to’o setembru rekolla $22,000.00, no trimestre ikus outubru to’o dezembru rekolla $15,200.00 ne’ebé totál hamutuk $54,550.
“Kritéria atu halo pasaporte ne’e presiza dokumentu rua de’it, sertidaun moris RDTL ho kartaun billete identidade, la presiza tán dokumentu seluk,” nia afirma.
Nune’e hosi orsamentu ne’e iha ema na’in-919, komposta hosi pasaporte komún ema na’in-895, sira-ne’ebé hasai pasaporte servisu ema na’in-24 de’it, tanba pasaporte servisu ne’e iha lei autoriza ba kargu xefia sira PNT NO F-FDTL ba sira-ne’ebé maka mai ho viajen ofisiál reprezenta Estadu ba estranjeiru.
Tuir nia, reseita tinan 2022 iha mudansa sa’e kompara ho 2021 ba kotuk, entaun ida-ne’e hatudu katak, komunidade barak mak hakarak halo vizita ba estranjeiru.
Diretór Rejistu Sivíl ne’e fundamenta, dezafiu durante ne’e enfrenta maka preokupasaun komunidade tanba laiha serteza atu foti dokumentu pasaporte ne’e, tanba kona-bá planu atu foti tenke iha nasionál hodi hetan asinatura hosi diretór nasionál.
Nune’e mós fasilidade hanesan komputadór, internete no mobiliáriu meja no kadeira, maibé difikuldade ne’e la’ós sai problema iha serbisu loron-loron nian, ho esforsu tomak hosi fó atendimentu dignu ba komunidade sira.
“Kuandu hasai $50 tenke foti iha loron 10, maibé dalaruma la akontese tanba prosesu imprime no asinatura iha Dili, hanesan mós ho $75 loron tolu tenke foti no $100 tenke foti maibé dalaruma labele, tanba iha Oé-Cusse fasilita de’it, atu foti tenke iha nasionál,” nia afirma.
Nune’e solusaun ne’ebé iha maka, kada rekerente tenke konfirma ho família balu iha Dili maka lori dokumentu evidénsia hosi Oé-Cusse nian, aprezenta iha nasionál maka foin bele foti.
“Ami funsionáriu iha Oé-Cusse mós difisil atu ba foti iha Dili ho tempu determinadu tanba bainhira viajen presiza autorizasaun hosi Autoridade RAEOA, kuandu aprova tarde ne’e sai preokupasaun ba rekerente sira, karik iha autorizasaun mós presiza fasilita di’ak ba transporte no alozamentu ba funsionáriu ne’ebé viajen, entaun solusaun di’ak maka husu tulun hosi família iha nasionál atu foti,” nia afirma.
Jornalista : Abílio Elo Nini
Editór : Evaristo Soares Martins
