BONONARO, 10 janeiru 2022 (TATOLI) – Provedoria Direitu Humanu no Justisa (PDHJ) lideradu Virgílio da Silva Guterres ‘Lamukan’ ezije loke investigasaun kle’an ba kazu agresaun fíziku hasoru Cristiano Emanuel da Costa tinan (16) ne’ebé deskonfia envolve hosi ajente polísia balun iha munisípiu Bobonaro.
Diretór PDHJ Delegasaun Territoráal Maliana, Domingos Pinto Tavares, haktuir hafoin akontesimentu iha loron 27 dezembru 2022, tuku 8:00 dadeersan família Cristiano hato’o keisa ba PDHJ Maliana no iha momentu ne’ebá ekipa sira ba observa no rekolla kedas informasaun iha Hospital Referál Maliana.
Notísia relevante: Komisaun B hein relatóriu oknum membru PNTL baku labarik to’o grave
“Ami-nia provedór mós hasai ona desizaun katak, kazu ne’e tama kedas ba investigasaun, ne’ebé la sala semana oin, ekipa imvestigadór sei tún halo investigasaun imediata,” Domingos informa ba jornalista sira, SoSo, Maliana, tersa ne’e.
Enkuantu ekipa fiskalizasaun PDHJ Maliana mós rekolla ona informasaun inisiál hosi parte Igereja Parókia Santa Cruz Maliana, no loron segunda ne’e kontinua konfirma tán ho Komandante Polísia Munisípiu Bobonaro, Superintendente Antoninho Mauluta, kona-bá orden ne’ebé hatún ba membru sira halo atuasaun ba labarik sira tiru fogete iha bairru Pemancar, aldeia Acu-Laca, suku Lahomea.
Diretór Domingos fundamnta, iha prosesu konfirmasaun ne’e parte Polísia kontinua relata kona-ba informasaun ne’ebé espalla ona ba públiku katak Cristiano Emanuél hetan membru Polísia hakfodak mak halai monu kona fatuk rezulta nehan parte oin monu hotu.
Nia haktuir, kona-bá informasaun dehan membru sira halo agresaun fíziku parte komandu seidauk bele fó komentáriu ruma tanba kazu ne’e sei iha prosesu nia laran.
“Ami-nia servisu ne’e fiskalizasaun de’it, katak ba rekolla de’it informasaun inisiál, hanesan ha’u rona ida ne’e ba konfirma loos ka lae, tanba ne’e agora ha’u-nia kolega sira sei dezenvolve hela relatóriu, depois ekipa investigasaun tún mai mak loke prosesu ne’e luan, tuir relatóriu ne’ebé ami hato’o,” nia katak.
Nia dehan, daudaun ne’e Cristiano Emanuel da Costa, alta ona hosi Hospital Nasional Guido Valladares (HNGV) Bidau, Dili, maibé sei kontinua halo terapia.
Enkuantu foin lalais ne’e parte família Cristiano hato’o ona keixa ba Polísia Sientífika Investigasaun Kriminál (PCIC, sigla portugés) no Ministériu Intérior atu loke prosesu imvestigasaun kle’an ba kazu refere.
Notísia relevante: Komandu PNTL rejeita informasaun membru baku labarik to’o grave iha Bobonaro
Jornalista : Sérgio da Cruz
Editór : Evaristo Soares Martins
