PNTL Covalima promove diviza ba membru 10 sai ajente prinsipál

COVALIMA, 10 janeiru 2023 (TATOLI)–Komandu Polisía Nasionál Timor-Leste (PNTL) Covalima, tersa ne’e, promove diviza ba membru na’in-10 ne’ebé hetan promosaun diviza hosi ajente ba ajente prinsipál.

“Ohin membru PNTL na’in-10 hetan promosaun diviza hosi ajente ba ajente principal. Sira-ne’e hetan promosaun hanesan antiguidade durante periódu tinan lima (5) sira-sai ajente hodi promove ba ajente principal,” Komandante PNTL Covalima, Superintendente Polísia Basílio de Jesus hato’o ba jornalista sira, iha komandu PNTL Covalima Santa Rosa.

Promosaun diviza ida-ne’e, nia dehan, haree ba durante ne’e membru sira presta ona sira- nia servisu iha instituisaun PNTL, espesiál iha munisípiu Covalima no ba instituisaun Estadu.

Tanba ne’e, hosi komandu jerál PNTL rekoñese durante ne’e sira fó sira-nia konstribuisaun no dedikasaun ne’ebé sira fó,  servi povu ida-ne’e hodi hala’o misaun ho papel hanesan ajente seguransa sira-nia direitu atu hetan promosaun durante periódu tinan lima (5).

Atu hetan promosaun diviza ne’e haree ba sira-nia dixiplina no prestasaun di’ak, laiha impedimentu presta servisu bainhira to’o tempu tenke promove diviza maibé depende mós ba sira-nia prestasaun servisu.

Maibé promosaun diviza ne’e hetan pendente bainhira sira enfrenta kazu ruma ne’ebé sei iha departamentu justisa mak haree,  maibé se laiha entaun to’o tempu ne’e sira hetan promosaun ba sira-nia diviza.

Membru PNTL na’in-10 fó promosaun diviza ne’e mai hosi forsa rezerva na’in-tolu (3), unidade tranzitu rua (2), investigasaun na’in-ida  (1), polísia komunitária na’in-ida (1), polísia eskuadra- rua (2)  no lojistíka na’in-ida (1).

 Jornalista : Celestina Teles.

Editór        : Cancio Ximenes