Somotxo husu MOP halo manutensaun ba iluminasaun iha fatin públiku

DILI, 10 janeiru 2023 (TATOLI)—Prezidente Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), José Agostinho Sequeira ‘Somotxo’, husu Ministéiru Obra Públika (MOP) no EDTL atu halo manutensaun ba iluminasaun iha fatin ka estrada públiku iha kapitál Dili hodi fó naroman iha tempu kalan atu prevene krime.
Notísia Relevante: MOP orienta EDTL, E.P normaliza iluminasaun iha kapitál Dili

“Atu kombate kriminalidade ne’ebé daudaun ne’e mosu tenke iha serbisu inter-ministeriál. Ezemplu, halo manutensaun ba iluminasaun iha dalan públiku iha kapitál Dili laran ne’e,” Prezidente komisaun B ne’e hato’o liuhosi reuniaun plenária PN, tersa ne’e.
Tuir nia, bainhira nakukun konserteza krime sira sei akontese nafatin, tanba ne’e husu MOP atu haree lalais iluminasaun hanesan iha tasi-ibun.
“Ezemplu, hosi Arbiru Beach mai to’o Faról ba ponte Habibie to’o Cristo Rei, ida-ne’e tenke halo nia manutensaun. Tanba, iluminasaun uluk iha tiha ona depois laiha manutensaun mate hotu, agora nakukun,” nia hateten.
Tanba, tuir nia, fatin públiku sira-ne’e bainhira tempu kalan mak liu ho motor no karreta barak mak para iha nakukun laran, ida-ne’e krime sira bele mosu.
Prezidente Komisaun B ne’e agradese liuhosi reuniaun plenária PN hosi segunda-tersa (09-10) janeiru tinan ne’e, tanba deputadu barak mak hato’o mós preokupasaun estabilidade liu-liu iha kapitál Dili ne’ebé rezultadu vítima ema mate no kanek.
Deputadu KHUNTO, António Verdiál, husu Ministru Interiór (MI) atu fó orientasaun ba Komandatu Jerál PNTL hodi intensifika operasaun iha kapitál Dili iha tempu kalan, nune’e movimentu popupulasaun sente seguru.
Hatán ba ida-ne’e, Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten preokupasaun deputadu sira-nian ligadu situasaun seguransa ema oho malu no sona hakanek malu hanesan akontese loron hirak liubá iha Elemloi, ponte Habibie, enkamiña ona ba parte seguransa atu tau atensaun.
Enkuantu, tersa (10/01) ne’e, Prezidente Repúblika (PR), José Ramos Horta, konvoka reuniaun Konsellu Superiór Defeza no Seguransa (KSDS), iha Palásiu Prezidensiál Nicolau Lobato, relasiona situasaun seguransa ne’ebé akontese daudaun oinsá foti medida hodi halo prevensaun ba entre timoroan hakanek no oho malu.
Iha enkontru ne’e, marka prezensa hosi Primeiru-Ministru (PM) Taur Matan Ruak, Ministru Prezidénsia Konsellu Ministru (PCM, siglá portugés) Fidelis Leite, Ministru Justisa (MJ) Tiago Amarál, Deputadu David Dias Ximenes ‘Mandati’, Deputadu Adéritu Hugo, Xefe Estadu Maiór Jenerál FALENTIL-Forsa Defeza Timor-Leste (F-FDTL) Tenente Jenerál Falur Rate Laek, Komandante Jerál PNTL Komisáriu Faustino da Costa, ho dirijente Polísia Sientífika Investigasaun Kriminál (PCIC, siglá portugés) no Servisu Nasionál Intelejinsia (SNI).
Jornalista : Nelson de Sousa
Editór : Cancio Ximenes

