Autoridade RAEOA oferese nesesidade bázika ba vítima dezastre naturál iha Samoro
OÉ-CUSSE, 11 janeiru 2023 (TATOLI) – Komisaun Jestaun Risku Dezastre (KJRD) iha Rejiaun Administrativa Espesiál Oé-Cusse Ambeno (RAEOA), kuarta ne’e oferese nesesidade bázika ba vítima uma-kain rua tanba afeta dezastre naturál rai halai estraga rezidénsia iha bairru Samoro, suku Costa, sub-rejiaun Pante Makasar.
KJRD ne’e komposta hosi, Sekretária Rejionál ba Asuntu Edukasaun no Solidariedade Sosiál (SRESS), Autoridade Protesaun Sivíl, Bombeiru hamutuk ho parseiru dezenvolvimentu Cruz Vermelha Timor-Leste Filiál Oé-Cusse (CVTL).
Lamberto Teme, hanesan vítima, esplika akontese rai halai estraga nia uma ne’e maibé viziñu mak atu hadi’a nia fatin, ke’e hosi okos, entaun ida-ne’e maka afeta ba Teme nia uma.
“Ha’u-nia uma sorin monu duni, nia uma mós rai atu taka metin ona, agora tempu udan no kalan ami labele toba, ami tenke ba buka fatin seluk atu toba, tanba ta’uk mak akontese uma monu, bele estraga oan sira inklui ami hanesan inan-aman,” Lamberto konta kronolójia ne’e iha nia rezidénsia bairru Samoro.
Nia informa, molok akontese dezastre konsege halo prevensaun hodi halo moru, gabiaun no kuda au, maibé esforsu ne’e la konsege salva sira-nia residénsia hodi rezulta uma nakfera hotu no besik atu monu.
Xefe Departamentu Protesaun Sivíl iha Oé-Cusse, Domingos Meni, informa, apoiu ne’e hanesan emerjénsia ne’ebé vítima hotu-hotu konsidera hanesan família afetadu hosi dezastre oinoin inklui rai halai.
“Ne’ebé ita verifika depois kontinua kedas ho apoiu emerjénsia, apoiu ne’e mós bazea ba Estadu no Guvernu nia kbiit ne’ebé mak iha,” nia katak.
Kona-bá konstrusaun ba uma rua ne’e, parte ekipa Komisaun Jestaun Risku Dezstre Naturais Oé-Cusse, la promete maibé fó hanoin nafatin ba vítima oinsa serbisu hamutuk no halo prevensaun nune’e bele salva hosi situasaun ne’e.
Entretantu, apoiu emerjénsia ne’e ho tipu ai-han (food item) mak hanesan, foos saka ida, supermie, mina goreng, ikan-lata, susubeen no hahán seluk tan, nune’e mós la’os ai-han (non-food item) komposta hosi ekipamentu dapur nian, ropa, lona, no seluk tán.
Jornalista : Abílio Elo Nini
Editór : Evaristo Soares Martins
