DILI, 11 janeiru 2023 (TATOLI)—Ministru Obra Públika (MOP), Abel Pires da Silva, informa, empreza responsável sei hahú reabilitasaun estrada diresaun Uai-aka, postu administrativu Quelicai bá Nahareka, postu administrativu Ossu, munisípiu Viqueque no postu administrativu Laga bá Baguia, iha tempu badak.
“Prosesu reabilitasaun estrada ne’e rasik antes ne’e Primeiru-Ministrua, Taur Matan Ruak, halo ona lansamentu fatuk dahuluk, maibé tanba loron-boot, entaun empreza sei hahú serbisu iha fulan ne’e nia-laran,” Ministru hateten iha Palásiu Governu, kuarta ne’e.
Antes ne’e, Governu halo lansamentu estrada diresaun rua iha fatin diferente, hanesan estrada reabilitasaun postu Quelicai bá postu Ossu, Nahareka hala’o iha área Uai-aka, suku Abafala no estrada diresaun postu Laga bá Baguia, hala’o iha suku Soba.
Notísia relevante: PM Taur hatur fatuk dahuluk konstruksaun estrada Quelicai-Ossu
Objetivu implementa projeitu ne’e tanba Governu hakarak promove konetividade tuir padraun estrada munisípiu hodi kontribui ba dezenvolvementu sósiu-ekonomiku iha área rurál.
Estrada postu Quelicai rasik ho distánsia kilómetru 22,7 no luan metru 7, komposta hosi aspál metru 4, alargamentu metru 1, ombru metru 2, dreinajen, morru protesaun, sinál tráfegu no kuda ai-oan iha fatin risku.
Enkuantu, estrada diresaun Laga-Baguia purvolta kilómetru 38 ho luan metru 6, responsável hosi empreza Norinco Internasional Corporation, ho kustu projetu millaun $21,7.
Aleinde ne’e, Diresaun Nasionál Estrada, Ponte no Kontrolu Cheia hosi MOP prevee orsamentu iha fundu infraestrutura ba tinan fiskál 2022 hamutuk $16.547.661,76.
Durasaun reabilitasaun estrada ba fulan-18, ne’ebé responsável hosi empreza Chongqing Internasional Construction no supervizaun hosi empreza PY konsep perunding Sdn Bhd hosi Malázia, ho durasaun kontratu fulan-18 ho kustu $452.122.
Jornalista : Arminda Fonseca
Editora : Julia Chatarina
