ESGP Suai sei halo rekrutamentu ba profesór kontratadu na’in-10
COVALIMA, 11 janeiru 2023 (TATOLI)–Diretór Eskola Sekundáriu Jerál Públiku Suai (ESGP, sigla-portugés), Francelino Freitas Carvalho, hateten ESGP Suai sei halo rekrutamentu ba profesór kontratu na’in-sanulu (10), tanba atu koloka mós profesór ba eskola paralelu ne’ebé foin estabelese.
“Ita halo rekrutamentu ba profesór sira-ne’e tanba agora responsavél eskola paralelu rua ne’e, sira halo kolokasaun profesór liuhosi ha’u-nia adjuntu diretór no Xefe gabinete sei-halo planu hodi halo kolokasaun ba professor sira. Hira mak atu koloka ba eskola paralelu no na’in-hira mak iha eskola sentrál,” Francelino Freitas Carvalho hateten ba Agência Tatoli, iha ESGP Suai, kuarta ne’e.
Razaun eskola halo rekrutamentu ba profesór konstratadu sira-ne’e, tanba bainhira adjuntu no xefe gabinete halo planu kolokasaun profesór ba eskola paralelu sira-ne’e entaun profesór menus iha eskola sekundáriu, nune’e presiza atu halo rekrutamentu.
Eskola iha planu halo rekrutamentu bazea ba nesesidade eskola, tanba eskola rasik iha orsamentu uitoan hodi rekruta profesór kontratadu sira.
Prosesu rekrutamentu eskola sei loke vaga ba públiku, nune’e Covalima-oan sira-ne’ebé iha kapasidade bele konkore vaga ne’ebé eskola sei fó sai, hodi halo teste hahú selesaun dokumentu to’o iha simulasaun.
“Ami iha orsamentu uitoan ne’ebé ami prevee atu halo rekrutamentu, nune’e vaga ami sei loke ba públiku hodi fó oportunidade ba Covalima-oan tomak hakarak konkore hodi tuir teste ne’ebé hahú iha faze selesaun dokumentu to’o simulasaun,” nia hateten.
Tuir dadus profresór iha eskola sekundáriu Jerál Públiku Suai hamutuk na’in-85 ne’ebé kompostu hosi profesór permanente nain-31, profesór parsiál nain-31 no profesór kontratadu nain-25.
Enkuantu, daudaun ne’e eskola sekundáriu jerál públiku Suai hahú halo ona inskrisaun ba estudante foun períodu tinan 2023 ne’ebé hahú iha segunda (09/01/23) no sei ramata iha loron sábadu (14/01/23).
Jornalista : Celestina Teles
Editór : Cancio Ximenes
