DILI, 11 janeiru 2023 (TATOLI)—Governu liuhosi reuniaun Konsellu Ministru (KM), kuarta ne’e, aprova projetu deliberasaun, ne’ebé aprezenta hosi Primeiru Ministru (PM), Taur Matan Ruak, kona-ba regularizasaun pagamentu renda relasiona ho arrendamentu imovel Estadu hanesan ne’ebé temi ona iha akordu espesiál investimentu, ne’ebé aprova hosi Rezolusaun Governu númeru 22/2010, loron 14 abril.
“Objetivu mak atu regulariza pagamentu ba arrendamentu empreza ENSUL sei halo atu nune’e hosi parte justisa nian avansa ho rekolla pagamentu, ne’ebé Konsellu Ministru halo deliberasaun no fó instrusaun atu prosede tuir akordu investimentu ne’ebé asina ona iha tinan 2010,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.
Nia dehan, servisu sira hosi departamentu governamentál kompetente sei hala’o dilijénsia administrativa ne’ebé presiza, ho objetivu atu asegura resesaun ba montante sira ne’ebé investidór esternu tenke selu, tuir saida maka prevee ona iha akordu espesiál investimentu nian.
Notísia relevante: SETP hahú sukat rai Estadu ne’ebé utiliza hosi empreza ENSUL
Antes ne’e, iha loron 25 abril 2022, Ministru Justisa, Tiago Amaral Sarmento, hala’o reuniaun dahuluk ho Prezidente ENSUL, Alexandre Marques Couto, hodi ko’alia kona-ba konstrusaun Dili Financial Business Center (DFBC), ne’ebé harii iha rai Estadu ho objetivu atu selu arrendamentu ba Estadu.
Maibé Tribunál Rekursu deside rai ne’e sidadaun ida nian, tanba ne’e Ministériu Justisa planeia sei konvida dirijente empreza internasionál ne’e hodi halo diskusaun, nune’e bele hetan konkordánsia ikus tanba estatutu rai ne’e iha hela tránzitu injulgadu.
“Ami sei bolu parte ENSUL hodi diskute katak desizaun Tribunál Rekursu nian kona-ba rai no uma ne’e pertense ba Estadu ka oinsá, tanba desizaun Tribunál ne’e boot liu desizaun hotu, ita tenke hakruk,” Ministru Tiago Amaral Sarmento hateten.
Empreza ENSUL Engenharia hosi Portugal hala’o serbisu iha Timor-Leste desde tinan 2000 no asina kontratu atu harii DFBC ka Sentru Negósiu no Finansa iha tinan-2012 no halo lansamentu konstrusaun ho fatuk dahuluk iha loron 16 dezembru 2013.
Konstrusaun DFBC ne’e pertense ba empreza nian, ne’ebe lokaliza iha Colmera, iha rai medida 16.000 m².
Daudaun ne’e konstrusaun atinje ona andar 15, ho kustu orsamentu millaun $30, ne’ebé tuir planu obra ne’e sei ramata iha tinan-2023 nia rohan.
Jornalista : Antónia Gusmão
Editora : Julia Chatarina
