Komisaun B sei halo apresiasaun ba proposta-lei programasaun militár
DILI, 11 janeiru 2023 (TATOLI)—Komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), sei halo apresiasaun inisiál ba proposta-lei númeru 49/V(5a)-lei programasaun militár.
Notísia Relevante: Governu aprova Lei Programasaun Militár
“Lei ne’e horisehik mak foin baixa mai komisaun B. Agora komisaun haree prazu loron 30 atu halo diskusaun ba jeneralidade, espesialidade no finál global. Ne’ebé, komisaun tau ona ajenda atu hahú audénsia públika,” Prezidente komisaun B, José Agostinho Sequeira ‘Somotxo’, hateten ba Agência Tatoli iha PN, kuarta ne’e.
Konteúdu proposta-lei ne’e ko’alia kona-ba baze ba dezenvolvimentu forsa armada, nune’e polítika Governu hosi lei ne’e prevee saida mak kada tinan lima bele halo ba dezenvolvimentu instituisaun.
“Lei ne’e baze dezenvolvimentu militár ka modernizasaun forsa armada, ne’ebé iha laran buat barak. Tan ne’e, presiza komisaun C trata asuntu Finansa Públika hamutuk ho ami hodi haree. Tanba lei ne’e atu ezije orsamentu tanba ko’alia dezenvolvimentu forsa armada ne’e ekipamentu,” nia hateten.
Prezidente komisaun ne’e, informa proposta lei ne’e iha artigu hamutuk 22, posibilidade bele aumenta depende ba diskusaun, bainhira iha lakuna no nesesidade balun inklui sei enkaixa.
Enkuantu, kona-ba proposta lei ne’e detallu akompaña iha faze audiénsia ba apresisaun inisiál.
Iha reuniaun plenária, tersa (10/01/2023), meza plenária anúnsia no baixa proposta-lei númeru 49/V(5a)-lei programasaun militár ba komisaun B no C trata asuntu Finansa Públika.
Meza plenária anúnsiu no baixa mós ba komisaun B hodi fó apresiasaun inisiál ba proposta rezolusaun númeru 24/V(5a)-aprova akordu entre Governu Timor-Leste ho Governu Austrália kona-ba kooperasaun iha domíniu defeza no estatutu forsa vizitante.
Jornalista : Nelson de Sousa
Editór : Cancio Ximenes
