MS planu harii autoriedade reguladora hodi teste ai-moruk
DILI,11 janeiru 2023 (TATOLI ) – Ministériu Saúde iha ona planu atu harii autoriedade reguladora hodi teste aimoruk ninia kualidade hafoin populasaun sira konsumu.
“Ami iha ona preparasaun polítika iha tinan ne’e, ami sei harii autriedade reguladora ida hodi teste aimoruk nia kualidade”, Xefe Departamentu Jestaun Autorizasaun no Introdusaun Medikamentu, liuhosi Diresaun Nasionál Farmasia no Medikamentu iha Ministériu Saúde, Teodoro de Jesus, dehan iha edifísiu TATOLI,IP, ohin.
Nia informa atu harii autoridade reguladora ho objetivu bele kontrola ai-moruk sira nia kualidade bainhira importadór sira hatama mai.
“Ita iha ona Laboratóriu Nasionál Saúde, maibé ita tenke harii fali autoridade reguladora ketak para kontrola ai-moruk sira ne’ebé importadór sira hatama mai hafoin populasaun sira konsumu, ida ne´e ita tenki halo teste”, nia revela.
Teodoro afirma to´o oras ne’e Gvernu liuhosi MS sei kontinua uza referénsia laboratóriu Austrália nian hodi teste ai-moruk sira.
“Iha tinan ida ne’e SAMES iha ona mini laboratóriu. SAMES hola ona ekipamentu atu halo teste maibé seidauk funsiona entaun saida mak ita halo mak MS halo akordu ho nasaun viziñu Austrália hodi halo teste ai-moruk sira nia kulaidade”, Ezekutivu ne’e akresenta.
Iha 2023 Ministériu Saúde prevee Orsamentu Jerál Estadu (OJE) hamutuk $ 65,158,816 hodi kontinua prioritiza prestasaun servisu saúde ba populasaun tomak.
Jornalista : Felicidade Ximenes
Editór : Zezito Silva
