DILI, 11 janeiru 2023 (TATOLI)–Ministériu Transporte no Komunikasaun (MTK) planeia muda terminál transporte públiku hosi Becora ba Hera no Tasi-tolu ba Tibar, ne’ebé provizóriamente iha Manleuana maibé iha futuru muda ba Lahane.
“Prosesu infraestrutura ba terminál tolu ne’e ongoing hela, tanba ne’e finansiamentu hosi Banku Dezenvolvimentu Aziátiku (ADB, sigla inglés), entaun parseiru ne’e iha ninia prosedimentu ne’ebé ita tenke kumpre,” Ministru Transporte no Komunikasaun, José Agustinho da Silva, informa ba Agência Tatoli, iha Palásiu Governu, kuarta ne’e.
Dadaun ADB ne’ebé sei finansia projetu ne’e halo hela estudu viabilidade, akompaña mós hosi tékniku MTK.
Notísia relevante: Governu sei prepara terminál molok operasionaliza bus DAMRI
Aleinde ne’e, MTK no Diresaun Nasionál Transporte Terrestre halo avaliasaun durante loron-rua kona-ba regulariza movimentu transporte públiku sira iha Dili laran.
Ministru prefere, modelu terminál aliña ho Governu nia asaun atu adere ba organizasaun rejionál sira hanesan Asosiasaun País Sudeste Aziátiku (ASEAN, sigla inglés), nune’e infraestrutura terminál tenke prienxe rekezitu padraun internasionál tanba Timor-Leste iha rekursu umanu atu jere infraestrutura sira.
Jornalista : Antónia Gusmão
Editora : Julia Chatarina
