SMJMT sei identifika fatin turizmu iha Covalima
COVALIMA, 11 janeiru 2023 (TATOLI)–Sevisu Munisípal Jestaun Merkadu no Turizmu (SMJMT) Covalima sei identifika fatin turizmu iha postu administrativu hitu (7) iha munisípiu Covalima.
Diretór servisu munisipál jestaun merkadu no turizmu, Vitorino do Cormo, hateten tuir loloos programa atu identifika fatin turizmu iha Covalima ne’ebé atu implementa iha 2022 maibé tanba menus rekursu umanu, mak iha 2023 ne’e sei fó prióridade hodi identifika fatin turizmu iha Covalima.
“Iha tinan 2022, ami tau prióridade ba programa atu identifika fatin turizmu maibé la konsege identifika ho razaun menus rekursu umanu. Iha 2023, ami kontinua tau prióridade atu identifika fatin turizmu sira iha postu administrativu hitu (7),” Vitorino do Carmo hateten ba jornalista sira, iha nia servisu fatin, Bairru Costa, kuarta ne’e.
Programa identifika fatin turizmu sira-ne’e mak hanesan haree ba turizmu komunitáriu, turizmu relijiozu no turizmu istóriku iha postu administrativu sira-ne’ebé pertense ba munisípiu Covalima.
Hafoin identifika fatin turizmu, sei halo planu no foti desziaun atu fó prioridade ne’ebé mak atu halo uluk konstrusaun no reabilitasaun hodi atrai turista lokál no internasionál sira.
Tuir dadus, funsionáriu servisu iha servisu munisipál jestaun merkadu no turizmu hamutuk na’in-lima.
Jornalista : Celestina Teles
Editór : Cancio Ximenes
