DILI, 11 janeiru 2023 (TATOLI)—Prezidente Repúblika (PR), José Ramos Horta, kuarta ne’e, konvida Uniaun Nasionál Juventude Maubere (UNIJMA) Pró RDTL/CPD-RDTL hodi rona kona-ba rai Ai-Meti Laran iha Dili ne’ebé durante ne’e sai polémika iha públiku.
“Ohin, Prezidente Repúblika mak konvida mai atu esklarese kona-ba rai Ai-Meti Laran ne’ebé durante ne’e sai polémika iha públiku no atu rona faktu sira-ne’ebé hosi advogadu hato’o no Xefe Estadu sei haree. Órgaun soberanu iha nia kompeténsia rasik no Xefe Estadu rasik esplika katak nia sei la halo intervensaun ba prosesu judisiáriu. Maibé, prosesu hotu la’o iha Tribunál nia kompeténsia, nune’e Tribunál mak sei deside,” Advogadu hosi Fundasaun Lia Loos, Celestino Guterres, ne’ebé fó asisténsia ba UNIJMA Pró RDTL hateten ba jornalista sira hafoin ramata enkontru ho Xefe eztadu, José Ramos Horta, iha Palásiu Prezidensiál Nicolau Lobato, Bairru Pite.
Kona-ba kazu rai Ai-Meti Laran, parte advogadu halo rekursu no desizaun iha ona maibé prosesu ezekusaun mak sira-nia parte sei halo hela opozisaun ba ezekusaun ne’e tuir rekursu ne’ebé agora iha hela Tribunál Rekursu.
“Tribunál Distritál Dili (TDD) no notifikasaun mai tiha ona katak kazu ezekusaun ne’e suspende tiha ona no prosesu rekursu agora para hela Tribunál Rekursu nia kompeténsia,” nia dehan.
Durante sorumutu ne.e nia hateten, PR Horta hato’o ba advogadu hotu atu atende kliente sira-nia direitu ho di’ak no labele prejudika sira.
Portavós UNIJMA PRO RDTL, Ivo Sequeira, hateten durante enkontruPR hato’o ba sira-nia parte katak sei ko’alia ho parte órgaun judisiáriu no juiz sira la’ós loos hotu ba desizaun ne’ebé sai maibé lakohi povu ki’ik sira lakon sira-nia diretu iha nasaun ne’e.
“Tan ne’e, Xefe Estadu sei ko’alia ho Tribunál atu haree fila-fali kazu ne’e ho di’ak tuir lei ne’ebé vigór iha Timor Leste,” nia dehan.
Nia hateten, kona-ba mobilizasaun ema konsentra barak iha Ai-Meti Laran ne’e hanesan solidariedade ba Manuel Gusmão.
“Povu hamutuk 2274 konsentra iha rai Ai-Meti Laran, asaun demonstrasaun la’ós ameasa ka fó presaun ba Tribunál maibé hadi’a desizaun no erru ne’ebé mosu iha Tribunál, nune’e justisa bele la’o iha Timor. Konsentrasaun ne’e, sei kontinua hodi hein rezultadu ikus,” nia dehan.
Jornalista : Nelson de Sousa
Editór : Cancio Ximenes
