BAUCAU, 11 janeiru 2023 (TATOLI) – Autoridade Suku Buruma, postu admistrativu Baucau vila rekomenda governu insentiva komunidade agrikultór hodi subtitui programa sesta bazika.
Xefe suku Buruma, Libório dos Santos Freitas, eskplika, rajaun tanba programa sesta bazika seidauk responde problema ekonomia komunidade iha baze no la hanorin komunidade atu serbisu no halo dependensia ba governu.
“Programa ne’e habokur deit kompaña maibe laiha inpaktu ba komunidade iha futuru, tanba agora komunidade hein deit hosi governu,” Xefi suku Buruma informa ba Agênsia TATOLI iha vila antiga, kuarta ne’e.
Libório Freitas, argumenta, Timor-Leste seidauk hasoru krize alimentár grave nune’e sesta bazika laos meus atu rezolve problema ekonomia komunidade nian iha baze durante tempu naruk.
Autoridade Burumu rekomenda atu governu labele gasta orsamentu deit maibe tenki kria programa ne’ebé edukativu ba komunidade hanesan fó insentiva ba agrikultór sira atu investe iha toos no natar hanesan parte edukativu hodi halo serbisu
Suku Buruma rasik hamutuk benefisiáriu nain-3.784 simu ona sesta bazika iha fulan-novembru tinan-2022 kompostu aldeia haat hanesan aldeia Tasi hamutuk 463, Casmutu nain-717, Suli-ua nain-1.387 no Onosere hamutuk nain-1.217.
“Benefisiáriu sira prekupa ho item ne’ebé kompaña distribui tanba sasan sira ne’e la tuir osan ne’ebé aloka,” Xefi Libório Freitas hateten.
Hosi tótal númeru refere iha Benefisiáriu nain-97 mak naran la tama iha lista maibe depois halo konsultasaun ho kompaña ikus mai konsege rezolve hotu lista reklamante hirak ne’e.
Item ne’ebé simu hamutuk 14 kompostu fós kilograma 5, batar ikis, kotu, fore-mungu, masin-midar hamutuk kilograma 1, fehuk, hudi sesuik ida, ikan maran, manu-tolun, mina litru rua, mina verjem, omo no Café grama 250.
“Prograna ne’e habokur deit kompaña maibe laiha inpaktu ba komunidade iha futuru, tanba agora komunidade hein deit hosi governu,” Libório Freitas argumenta.
Suku Buruma maioria moris nu’udar agrikultór hanesan halo toos no natar ho tótal populasaun hamutuk rihun tolu resin kompostu aldeia haat hanesan aldeia Tasi Casmutu, Suli-ua no Onosere.
Jornalista : Natalino Belo
Editór : Evaristo Soares Martins
