DILI, 12 janeiru 2023 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P) sei prosesa distribuidór rua no supermerkadu ida ba Ministériu Públiku (MP) tanba halo espekulasaun ba presu sasán.
Sub-Inspetór Jerál AIFAESA, I.P, Dionísio Neto da Silva, hateten, distribuitór rua ne’e mak Perissos, Serba Ada no supermarket Dili Mart.
“Ba Dili Mart aban sira sei submete fatura atu ita haree, maibé prosesu kontinua la’o, tanba sira fa’an produtu masin-midar stock tuan. Ita hatene folin masin-midar saku ida antes ne’e $43 agora sa’e ba $80, bebida non alkoólika kaixa ida antes $6,50 agora sa’e ba $18. Haree hosi presu sira durante inspesaun, ita identifika produtu ne’ebé sira fa’an la’ós foun maibé tuan, ida-ne’e hatudu sira halo espekulasaun presu, entaun ita sei prosesa sira ba Ministériu Públiku (MP),” Sub-Inspetór Jerál AIFAESA, I.P, informa ba Agência Tatoli, via telefónika, kinta ne’e.
Notísia relevante: AIFAESA, I.P halo apreensaun ba produtu masin-midar iha Dili laran
Nia dehan, AIFAESA, I.P sei prosesa entidade ekonómika sira bazeia ba dekretu-lei númeru 29/2011 20 juñu kona-ba presu justu ne’ebé hateten marjen komersializasaun bele hetan lukru maibé labele liu hosi 10% to’o 15%, nune’e liga mós ba lei númeru 4/2011 01 juñu kona-ba krime asambarkamentu no espekulasaun presu bandu produtu stock tuan, labele fa’an fali iha situasaun hanesan agora.
“Ida-ne’e krime, entaun ita sei prosesa tanba na’in ba prosesu krime tomak ne’e mak Ministériu Públiku. AIFAESA só foti ninia evidénsia sira hotu no halo auto-notísia hodi enkamiña ba Ministériu Públiku mak foti desizaun. Ami rasik labele foti desizaun ba asaun krime ne’e,” nia akresenta.
MP mak sei foti desizaun ba infratór sira, atu multa ka pena prizaun, AIFAESA, I.P só enkamiña prosesu tomak liga ho erru ne’ebé entidade sira komete.
“Ami-nia parte foti desizaun ba de’it sansaun administrativu, ezemplu hanesan komersiante sira fa’an produtu liu prazu, lisensa mate ruma, no produtu estraga ruma, maka ami iha kompeténsia foti sansaun tuir dekretu-lei númeru 23/2009 kona-ba rejime infrasaun administrativa kontra ekonomia no seguransa alimentár,” Dionísio tenik.
Durante ne’e ekipa konjunta halo inspesaun ba distribuidór hitu, ne’ebé lima fa’an produtu ho folin normál no rua mak hamosu irregularidade inklui supermerkadu ida, enkuantu sira seluk folin normál.
“Ita nafatin husu importadór sira ne’ebé halo espekulasaun ba presu, ita alerta ona sira atu fa’an presu normál fali, maibé sira mantein ho presu a’as, ita la autoriza sira hala’o sira-nia atividade,” nia dehan.
Iha biban ne’e, relasiona ho folin sasán sa’e, nia husu ba públiku halo atu halo mós intervensaun.
“Karik imi hetan loja ruma hasa’e folin, tenke mai ho evidénsia hosi fatura loja ne’e nian no hasai loja nia foto hodi bele hato’o keixa mai, nune’e ita kaer toman ema bazeia ba evidénsia, maibé imi hato’o de’it informasaun laiha evidénsia, ida-ne’e ita prosesa susar tanba ita serbisu ho lei,” nia fó hanoin.
Jornalista : Arminda Fonseca
Editora : Julia Chatarina
