COVALIMA, 12 janeiru 2023 (TATOLI)–Xefe Departamentu Reprezentasaun Territoriál Planta Indústria Covalima, Francisco Sarmento, hateten Floresta Covalima sei selebra loron Nasionál Ai-Kameli ho atividade limpeza iha área rezervatóriu no halo manutensaun ai-kamelia iha postu administrativu Tilomar.
“Atu selebra Loron Nasionál Ai-Kameli Floresta Covalima ho inisitiva realiza atividade hanesan halo limpeza no halo manutensaun ba ai-kameli iha área rezervatóriu ne’ebé lokaliza iha postu administrativu Tilomar, munisípiu Covalima tanba laiha orsamentu atu realiza programa,” Francisco Sarmento hateten ba Agência Tatoli, iha nia-kna’ar fatin, Kampung Baru, kinta ne’e.
Área rezervatóriu ne’ebé atu halo limpeza mak hanesan área rezervatóriu ai-kameli ekrate neen (6) ne’ebé kuda ai-kameli dahuluk iha tinan 2005 no sira seluk iha postu administrativu Tilomar.
Durante ne’e, guarda floresta iha Covalima mós realiza atividade hanesan halo sensibilizasaun ba komunidade oinsá kuda ai-kameli hodi proteje ai-kameli ho di’akliu iha future bele fó rendimentu ba sira.
“Ami halo sensibilizasaun hodi fahe informasaun ba ita-nia komunidade oinsá sira bele kuda no proteje di’ak ai-kameli ba futuru bele fó rendimentu ba sirak. Ami mós enkoraja nafatin ba ita-nia toos-na’in sira oinsá kuda ai-kameli,” nia dehan.
Iha tinan 2022, Floresta Covalima liuhosi programa viveiru komunitáriu distribui ona fini ai-kameli kada 700 to’o 800 ba iha postu administrativu Fatululik, Fatumea, Maucatar, Suai, Fohorem no Fatumea.
“Kona-ba nia rezultadu ita fahe fini ba toos-na’in sira, entaun ita fó mensajen ba sira kuidadu no proteje tanba toos-na’in sira kuda iha sira-nia toos rasik,” nia hateten.
Jornalista : Celestina Teles
Editór : Cancio Ximenes
