DILI, 11 janeiru 2023 (TATOLI)–Prezidente Instituto para a Defesa dos Direitos da Criança (INDDICA), Dinorah Granadeiro, hateten INDDICA koordena ho Autoridade Portuáriu Timor-Leste (APORTIL) atu kontrola labarik sira hosi Oé-Cusse halo viajen mesak mai Dili, hodi halo atividade negósiu iha kapitál Dili.
Notísia Relevante: INDDIKA introdús papél direitu-devér labarik ba estudante Kátolika Oé-Cusse
“Iha novembru 2022, ami koordena ho APORTIL atu kria mekanizmu oinsá mak bandu labarik sira halo viajen mesak. Agora ami prepara ona kestináriu ne’ebé APORTIL husu atu sira integra iha sira-nia regulamentu hodi kontrola. Bainhira labarik ruma mak iha portu atu sa’e ró, karik bele tenke deklara katak viajen mesak ka ho família. Sira mai ne’e iha tempu eskola ka feriadu, depois sira mai iha nesesidade urjente, presiza deklara,” Dinorah Granadeiro hateten ba Agência Tatoli liuhosi programa “Entrevista Eskluziva” iha studio Agência Tatoli, I.P, Faról, Dili, kuarta ne’e.
Tuir nia, se laiha kontola mak labarik sira livre ba mai Dili ho RAEOA tanba de’it labarik sira mós la uza billete no idade 14 mai kraik la’o tama-sai livre.
“Kestaun ida-ne’e mós INDDICA informa ona ba Prezidente Autoridade RAEOA hodi kontrola bainhira labarik sira hosi Oé-Cusse halo viajen mai Dili,” nia dehan.
Tanba ne’e, INDDICA ho Prezidente Autoriadade RAEOA koordena no planu atu oinsá mak bele forma ekipa ida hodi asegura no kontrola labarik sira tanba labarik sira halo atividade negósiu iha kapitál Dili ne’e maiória hosi RAEOA.
Labarik sira maiória hosi RAEOA no sira hela iha Aitarak Laran hamutuk ho nia família ka nia primu ruma ne’ebé eskola iha Dili, no labarik sira-ne’ebé mai iha Dili ne’e mesak idade 13 mai kraik entaun la sosa billete ró nian.
“Labarik faan dalan ninin maiória hosi Rejiaun Administrativa Espesiál Oé-Cusse Ambeno (RAEOA), entaun iha 2019 INDDICA halo asesmentu ho labarik sira depois halo kedas koordenasaun ho Prezidente Autoridade RAEOA. Iha ne’ebá, iha kedas ona konkordánsia katak atu forma ekipa konjunta entre INDDICA ho ekipa autoridade RAEOA nian, atu servisu hamutuk oinsá mak bele haree no asegura sira-ne’ebé mak ho solusaun rua mak re-integra fali sira ba sira-nia família. Buat seluk, INDDICA mak buka meiu oinsá labarik sira kontinua eskola iha Dili,” nia hateten.
Preparasaun, nia dehan, INDDICA halo hotu ona maibé tanba COVID-19 entaun INDDICA labele kontinua, maibé iha 2021 iha setembru-outubru nia-laran INDDICA halo fali koordenasaun no iha tempu ne’ebá konkorda no iha tempu badak ekipa sei estabelese hodi halo servisu.
To’o agora seidauk hala’o tanba sei hein instrusaun hosi Prezidente Autoridade RAEOA nian hodi oinsá foti desizaun ba asuntu ne’e, maibé INDDICA kontinua halo aproximasaun ho labarik sira no inan-aman sira iha uma.
“Prátikamente ita hasoru malu ho sira, ita enkoraja sira no iha labarik balun ne’ebé ami konsege fasilita no lori ba hela orfonatu balun iha Dili. Tanba labarik sira mak rekomenda katak sira hakarak eskola maibé sira-nia inan-aman laiha kbiit atu eskola no laiha fatin atu sira hela,” Dinorah dehan.
Ba kestaun ne’e, INDDICA koordena ho diretór orfonatu iha Dili no munisípiu no mós parte edukasaun nian hodi fasilita kontinua eskola.
Oinsá lori fila labarik sir aba sira-nia família, nia hatán, ekipa INDDICA lori labarik sira ba nia uma no aprezenta ba inan-aman maibé inan-aman dehan katak “ami para ne’e, imi mak fó han ami”, entaun ho ida-ne’e INDDICA presiza lei ruma atu rezolve.
“Tanba bainhira ami ba halo entrevista ho inan-aman haree katak iha família balun ne’ebé laiha duni kbiit no iha balun moris sufisente, maibé sira mak hakarak uza duni labarik hodi halo servisu ne’e,” nia hateten.
Notísia Relevante: UNICEF-MSSI fasilita formasaun jestaun kazu protesaun labarik ba rede referál Oé-Cusse
Jornalista : Osória Marques
Editór : Cancio Ximenes
