BOBONARO, 12 janeiru 2023 (TATOLI)-Tuir dadus hosi diresaun servisu saúde munisípiu Bobonaro enumera labarik ho idade tinan lima mai kraik iha M mak sai alvu atu simu imunizasaun integradu durante kampaña nasionál ne’ebé organiza Ministériu Saúde no parseiru sira ba períodu semana rua.
Imunizasaun ne’e sei foka ba vasina sarampu no rubella, vasina foun Pnemococaal Conjugate Vaccine (PCV), póliu no oferese mikro-nutriente hanesan vitama (A), albendazól kobate ‘lumbriga’ no vasina Covid-19.
Ministra saúde, Odete Maria Freitas Belo, konvense inan aman sira hotu atu lori oan sira hakbesik ba postu vasinasaun ne’ebé estabelese ona iha suku to’o aldeia sira durante semana rua nia laran, nune’e bele hasa’ae sira-nia imunidade isin hodi kontra moras.
Notísia relevante: MS lansa imunizasaun integrada iha Bobonaro
“Importante mak inan-aman sira tenke prepara ai-haan ne’ebé di’ak ba oan sira, atu nune’e mai simu vasina labele hetan efeitu sekundáriu ne’ebé mak ita hotu-hotu lakohi akontese,” nia hateten iha intervensaun ba atividade lansamentu kampaña nasionál imunizasaun integradu, iha suku Tapo-Memo, postu administrativu Maliana, kinta ne’e.
Tuir nia, vasina PCV atu prevene moras meningitis ne’ebé provoka labarik sira sofre Infeksaun Respiratóriu Aguda (IRA) no moras póliu bele halo ema-nia liman no ain kle’uk.
Enkuantu moras sarampu bele hamate ema maske nia síntoma iha de’it isin kulit, maibé bele halo isin manas dada iis ladi’ak no matan-mean bele sai matan aat ka delek bainhira la hetan tratamentu.
“Ida-ne’e mak akontese labarik sira la hetan aproveitamentu iha eskola, tanba la haree sai mak profesór sira hakerek iha kuadru. Sé ida-ne’e mak sira hetan, oinsá mak ita-nia jerasaun ba futuru,” Ministra Odete apela ba inan-aman sira.
Governante ne’e mós orienta responsável servisu saúde sira hotu atu halo promosaun saúde ba komunidade sira nune’e bele hasa’ae sira-nia koñesimentu atubele lori sira-nia oan partisipa programa ne’e.
Diretór servisu saúde munisípiu Bobonaro, João Barreto Cardoso, reforsa atu atinje meta ne’ebé governu define ona, saúde Bobonaro mós prepara postu vasinasaun 224 ne’ebé estabelese iha fásilidade saúde, sede suku no eskola pre-primáriu sira kobre suku 50 no postu administrativu neen.
“Ita tenke otimista, ami sei organiza ekipa ne’ebé iha atu tún ba fatin hotu-hotu, kuandu semana haat nia laran maka atinjementu hosi 94% ami sei iha tempu semana rua hodi halo swiping hodi buka-tuir labarik sira iha uma ne’ebé maka la mai postu vasinasaun,” nia katak.
Diretór João haktuir, kobertura ba atinjimentu sira kona-ba sarampu iha iha tinan 2020 to’o tinan kotuk kuaze atinje 60% de’it kompara ho tinan hirak liu ba atinje to’o 80%, tanba tanba impaktu hosi pandemia Covid-19.
Notísia relevante: OMS sertifika Timor-Leste susesu elimina moras sarampu
Jornalista : Sérgio da Cruz
Editór : Evaristo Soares Martins
