MS lansa kampaña imunizasaun vasina integrada rutina iha Covalima
COVALIMA, 12 janeiru 2023 (TATOLI)–Ministériu Saúde (MS) liuhosi Diretór Nasional Orsamentu no Jestaun Finansa Ministériu Saúde, Miguel Maria, hala’o lansamentu kampaña imunizasaun nasionál integradu rutina Sarampo, Rubella, Polio no Introdús Vasina PCV, distribuisaun vitamina A no Albendazol iha Munisipiu Covlima.
“Ita-foin atravesa situasaun pandemia COVID-19 iha ita-nia nasaun entaun ita-nia servisu vasina rutina kuaze paradu. Iha nasaun Sudeste Aziátiku ita-nia atendimentu vasina rutina menus tebes. Ita la esforsu hodi sai kobertura surtu kazu sei mosu mai ita-nia oan-sira. Entaun ita-tenke halo kampañia nasionál atu duni atinjementu tarde, iha tinan rua kotuk ne’e, nune’e ita-nia oan sira labele hetan moras,” Miguel Maria hateten ba jornalista sira iha Aldeia Asumaten, suku Debos, postu administrativu Suai, kinta ne’e.
Ho pandemia COVID-19 hatudu iha tan vasina COVID ne’ebé iha tinan rua ba kotuk halo esforsu hakarak integra vasina regular, nune’e bainhira labarik sira moris mai tenke vasina integradu bainhira simu vasina ketak ladún efetivu.
“Bazea siéntifiku sira halo estudu hodi identifika vasina katak laiha meiu atu prevene ita-nia oan sira moras investimentu. Ita nia-oan sira vasina importante tebes laiha buat ho vasina bele fo imunidade di’ak,” nia dehan.
Labarik sira vasina aumenta sira-nia idade bele dezenvolve sira-nia imunidade hamutuk ho sira-nia kresimentu proteje hosi kualker moras, la’ós la moras maibé sira moras la grave bainhira fó ai-moruk bele salva.
Tanba ne’e, nia dehan, bainhira labarik sira la vasina kona moras hada’et ba labarik seluk mós lais no ho kondisaun grave mós lais tebes.
Xefe suku Debos Agustinho da Silva, sente kontente pesoál sira tun direta ba iha komunidade nia leet hodi hala’o kampaña imunizasaun ba labarik sira.
“Ha’u kontente bainhira pesoál saúde tun direta hodi hala’o kampaña vasinasaun tanba realiza programa ida-ne’e servisu hamutuk ho saúde hodi halo mikro planu no ohin bele halo lansamentu,” nia dehan.
Ho nune’e, vasina ida-ne’e importante tebes liu-liu ba labarik sira ho idade tinan lima (5) mai kraik, importante tebes ba sira-nia saúde hodi asegura sira-nia saúde no hasa’e sira-nia imunidade.
Tanba ne’e, nia husu ba komunidade atu lori sira-nia oan hakbesik ba iha fasilidade saúde hodi simu vasina, tanba liuhosi vasina bele hasa’e labarik sira-nia imunidade hodi prevene moras sarampu, rubella, polio no seluk tan.
Jornalista : Celestina Teles
Editór : Cancio Ximenes
