MS lansa kampaña nasionál vasina integradu iha Viqueque
VIQUEQUE, 12 janeiru 2023 (TATOLI)–Ministériu Saúde (MS) liuhosi Gabinete Polítika, Planeamentu no Kooperativa, kinta ne’e, lansa kampaña nasionál vasina integradu iha munisípiu Viqueque.
Diretór Gabinete Polítika, Planeamentu no Kooperativa iha MS, Narciso Fernandes, hateten, inisiativa ne’ebé realiza iha Timor laran tomak ne’e hodi introdús vasina pneumococcal, sarampu, rubela, no polio, inklui ai-moruk lombriga ba labarik tinan-lima mai karik. Aleinde ne’e, labarik ho idade 12 ba leten simu vasina COVID-19 hosi doze 1, doze 2, no doze booster ba idade 18 ba leten.
“Ministériu Saúde realiza kampaña ne’e tanba ita-nia atinjimentu vasina ba sarampu, rubela no polio ho persentajen kiik liu COVID-19, ne’ebé sai ameasa iha mundu tomak inklui iha Timor-Leste, no fó impaktu ba atinjimentu labarik sira. Maski nune’e Timor-Leste simu sertifikadu hanesan nasaun ne’ebé kontrola rubela no elemina sarampu, nune’e atu mantein ida-ne’e ita tenke kontinua hasa’e imunidade ba labarak sira,” Diretór informa iha ámbitu kampaña nasionál vasina integradu, iha kampu futeból Beloi, Viqueque.
Notísia relevante: MS lansa kampana vasinasaun “Covid-19 seguru” ba komunidade_Tapo-Memo
Kampaña nasionál pertinente tebes hodi hasa’e labarik sira-nia imunidade nune’e mantein pozisaun nasaun ne’ebé simu ona sertifikadu hosi Organizasaun Mundiál Saude (OMS).
“Pakote vasina rua ne’e hodi hasa’e pakote kobertura hodi kontribui ba ita-nia oan sira-nia saúde no haree oan sira ne’ebé durante ne’e seidauk hetan vasina,” nia akresenta.
Kampaña nasionál ne’e lansa iha loron 12 janeiru no sei ramata iha loron 10 fevereiru, ne’ebé posibilidade sei la kontinua no depende ba atinjimentu vasina iha munisípiu Viqueque.
“Labarik sira sai prioridade ba programa ne’e no iha direitu tomak hodi hetan vasina. Karik iha postu saúde sira iha Viqueque maka seidauk atinje tanba mudansa klimátika, maka sei kontinua fó prioridade hodi atinje alvu,” nia tenik.
Iha fatin hanesan, Diretór Servisu Saúde munisípiu Viqueque, Francisco de Carvalho, hateten, kampaña nasionál ne’e ho mikro planu, nune’e kolokasaun pesoál saúde iha sentru saúde lima hodi fó vasina ba labarik sira.
“Ha’u husu ba komunidade Viqueque atu lori sira-nia oan sira ho idade lima mai karik ba besik fasilidade saúde hodi simu pakote vasina ida-ne’e,” nia apela.
Serimónia ne’e partisipa hosi Autoridade munisípiu Viqueque, Autoridade Polísia, Xefe sentru saúde lima, inklui inan aman sira.
Jornalista : Vitorino Lopes da Costa
Editora : Julia Chatarina
