DILI, 12 janeiru 2023 (TATOLI)—Primeiru-Ministru (PM)no Ministru Interiór (MI), Taur Matan Ruak, hateten komandu Polísia Nasionál Timor-Leste (PNTL) kontinua asegura estabilidade iha rai-laran.
“Polísia sei buka forma hotu mantein kalma no armónia, estabilidade iha ita-nia rai-laran,” Xefe Governu ne’e hateten ba jornalista sira hafoin hala’o enkontru semanál ho Prezidente Repúblika (PR), José Ramos Horta, iha Palásiu Prezidensiál Nicolau Lobato, Bairru Pite, kinta ne’e.
Durante enkontru Xefe Governu ho Xefe Estadu ko’alia kestaun seguransa iha rai-laran iha kapitál Dili ne’ebé sai preokupasaun iha loron hirak liubá akontese joven timoroan oho malu no sona kanek malu hanesan iha área Elemloi no Ponte Prezidente Habibie.
Maske nune’e, parte polísia nafatin ho forma hotu hodi garante nafatin situasaun hakmatek no buka tuir nafatin autór sira-ne’ebé envolve an halo krime.
“Ami ko’aliau uitoan seguransa ita preokupa loos ho akontesimentu sira ikus maibé garante ba Prezidente Repúblika katak Governu emjerál liu-liu Ministéiru Interiór no partikulár PNTL servisu makaas loos, buka tuir autór sira. Ita iha informasaun di’ak rona ema ne’ebé sona ita-nia joven iha Ponte Prezidente Habibie ka’er ona, no ita buka hela ida-ne’ebé sona ita nia joven iha Elemloi,” Taur dehan.
Xefe Governu ne’e garante katak daudaun ne’e parte polísia hala’o nia servisu no tempu badak sei kaer autór sira.
“Ha’u garante katak loron ida no rua tan sei ka’er, tanba ita iha kondisaun ka’er no responsabiliza ba sira-nia aktu. Tanba ema-nia vida só Maromak mak bele hasai, ita ema laiha direitu hasai ita-nia maluk ida-nia vida,” nia hateten
Notísia Relevante: Ema deskoñesidu oho joven ida iha Elemloi
Jornalista : Nelson de Sousa
Editór : Cancio Ximenes
