COVALIMA, 13 janeiru 2023 (TATOLI)–Eletrisidade de Timor-Leste, Empreza Públika (EDTL, E.P) sei estabelese sentru venda pulsa eletrisidade iha nivél suku sira atu fasilita kliénte sira labele la’o dook hosi suku ba munisípiu sosa pulsa eletrisidade nian.
“Ita iha planu atu estabelese sentru venda pulsa eletrisidade. Ita iha komisaun ezekutivu halo desizaun no deliberasaun estabelese sentru venda sira-ne’e iha suku, nune’e fasilita kliente labele la’o dook hosi postu ba munisípiu atu sosa pulsa eletrisidade nian,” Vise-Prezidente EDTL, E.P Covalima, Humberto Pereira, hateten ba ba Agência Tatoli, iha aldeia Lela, suku Holpilat, postu Maucatar, sesta ne’e.
Razaun, nia dehan, tanba atu fasilita kliente sira bainhira atu sosa pulsa eletrisidade hosi postu administrativu la presiza mai iha munisípiu hodi gasta osan ba transporte.
Ho nune’e, EDTL, E.P fó ona orientasaun ba tékniku sira iha munisípiu atu halo sensibilizasaun kona-ba estabelese sentru venda pulsa eletrisidade suku sira iha tempu badak.
“Iha semana kotuk ita enkontru ho kargu xefia nivél munisípiu no nasionál, ita atu implementa. Maibé agora ita sei estabelese nia regra mínimu SOP kada departamentu molok atu implementa,” nia informa.
Kritéria atu estabelese sentru venda atu sai kliénte hodi faan pulsa eletrisidade nian mak halo akordo ho EDTL, E.P no mós depozita nia osan mínimu $2000, sidadaun timoroan, iha komputadór no printer rasik.
Hafoin ne’e EDTL, E.P mós sei servisu hamutuk ho operadór Telemor, Timor Telekom no Telekomsel asesu liña internet nune’e evita kliente sira gasta osan ba transporta hodi sosa pulsa eletrisidade.
Abitante iha aldeia Lela, suku Holpilat, Candido Gusmão, sente triste tanba EDTL, E.P instala ona prepagu iha suku no to’o aldeia sira maibé seidauk estabelese sentru venda pulsa eletrisidade nian iha suku no aldeia sira.
“Ami sentre triste maske EDTL, E.P instala ona prepagu ba abitante sira iha suku no aldeia maibé sira la estabelese sentru venda pulsa, tanba ne’e ami tenke gasta osan transporte atu sosa pulsa eletrisidade iha munisípiu,” nia dehan.
Suku Holpilat iha nia aldeia hanesan Aldeia Hatu, Lela, Nainare, Manulor, Leogore no Fatuk-Oan ho nia populasaun hamutuk 2,7254.
Jornalista : Celestina Teles
Editór : Cancio Ximenes
