DILI, 13 janeiru 2023 (TATOLI) – Komisaun Reguladóra Arte Marsiál (KRAM) iha tempu besik sei apoia orsamentu milaun $2,5 ba Grupu Arte Marsiál (GAM) hamutuk 17.
Prezidente Komisaun Reguladóra Arte Marsiál, Octavio da Conseição, rekorda katak proposta ne´ebé KRAM halo tanba orientasaun hosi Sekretáriu Estadu Juventude no Desportu, Abrão Saldanha iha tinan kotuk no osan agora iha konta bankaria.
“Ami hetan orientasaun hosi Sekretáriu Estadu Juventude no Desportu (SEJD) hodi prepara proposta Fundu Apoiu Dezenvolvimentu ba arte marsiál ne’ebé iha tinan kotuk Parlamentu Nasionál aprova ona hamutuk millaun $2,5, osan agora iha ami-nia konta bankaria ona, entaun iha tempu besik ami sei bolu lider arte marsiál sira atu tuur hamutuk, nune’e bele distribui ba sira ida-idak maibé sei liuhosi prosesu”, Prezidente ne’e ba Agência TATOLI iha edifísiu Komite Olímpiku Nasionál Timor-Leste, ohin.
Nia rekorda katak orsamentu ne’e loloos halo ona ezekusaun iha tinan kotuk maibé tanba natal ho tinan foun entaun janeiru ne’e mak ita foin bele ezekuta.
“Agora ami sei estabelese ekipa jestaun ida ba fundu ne’e rasik atu bolu lider arte marsiál sira atu esplika kritéria hotu ne’ebé bele asesu ba fundu ne’e rasik, kritéria ne’e rasik ami prepara hotu ona hein atu aprezenta ba arte marsiál sira tuir akordu sira ne’ebé KRAM halo ho SEJD, bainhira esplika ona kritéria fó loron 10 ba arte marsiál sira atu submete fali proposta mai ekipa jestaun KRAM nian, los ona foin halo transferénsia orsamentu ba konta arte marsiál sira nian”, Octavio afirma.
Kritéria sira ba GAM atu asesu orsamentu ne’e mak
- Organizasaun sira tenke entrega estatutu atuál tuir primeira diretiva KRAM nian.
- Tenke aprezenta atividade saida de’it mak organizasaun sira halo tuir regulamentu segunda diretivu KRAM nian.
- Organizasaun sira tenke aprezenta ba KRAM liuhosi ekipa jestaun kona-ba programa sira ne’ebé mak sei halo durante ne’e, hodi fasilita atividade sira resensiamentu ba membru sira, harii sede ba organizasaun no halo kompetisaun doméstika ka internál kada organizasaun ida-idak no ikus liu halo formasaun téknika ba árbitru, treinadór, formasaun ba jestaun organizasaun no seluktan.
Organizasaun GAM hamutuk 17 ne’ebé atu asesu ba fundu ne’e mak, hanesan federasaun sira hamahan aan iha Konfederasaun Desportiva Timor-Leste (CDTL-sigla Portugés) kompostu hosi Taekwondo, Wushu, Boxe, Aikido, Karate-do, Kempo no seluktan, Federasaun Silat Timor – Leste (FSTL) kompostu hosi Persaudaraan Setia Hati Terate (PSHT), Ikatan Kera Sakti (IKS-PTL), Kmanek Oan Rai Klaran (KORK), Seruling Dewata, Persya Diri no Padjajaran.
Nia esplika, osan ne’e sei utiliza ba pluri anuál durante tinan haat no kada organizasaun sei hetan tuir atividade ida-idak nian.
“Osan ne’e ami fó sei bazeia ba proposta organizasaun ida-idak ne’ebé aprezenta tuir sira-nia atividade, maibé sei fó tuir etapa kada pursentu depende ba ezekusaun arte marsiál sira no validade sira nia relatóriu”, nia konklui.
Jornalista: Hortencio Sanchez
Editór : Zezito Silva
