COVALIMA, 13 janeiru 2023 (TATOLI)–Ministru Obras Públika (MOP), Abel da Silva Pires, hamutuk ho autoridade Covalima, sesta ne’e, inaugura projetu bee-moos iha aldeia Hatu no Lela, suku Holpilat, postu administrativu Maucatar, munisípiu Covalima.
Antes atu realiza serimónia inaugurasaun, komunidade iha aldeia Lela no Hatu, simu Ministru Obras Públika (MOP), Abel da Silva Pires, ho kultura hosi suku Holpilat.
“Ita halo inaagurasaun ba konstrusaun sistema bee-moos ne’ebé projetu inisiu hetan apoiu hosi embaixada Korea. Tanba orsamentu la sufisiénte entaun ami simu proposta hosi CVTL oinsá ajuda fundu bele kompleta tanba ministériu sempre apoiu tanba bee mak fó moris ba ita,” Abel da Silva Pires hateten ba jornalista sira iha aldeia Lela, suku Holpilat, sesta ne’e.
Governu apoiu fundu iha fatin barak komesa ona kompleta no ohin halo inaugurasaun ne’e tanba komunidade servisu ho lais no forma kedas ekipa, atu halo manutensaun ba bee-moos
“Ami kontente bainhira sira servisu ho lalais, sira forma ona ekipa manutensaun ida-ne’e sai ezemplu di’ak,” nia dehan.
Ministru mós husu ba komunidade uza bee-moos ho kuidadu, nune’e ema hotu bele asesu bee-moos ho durasaun tempu naruk.
Sekretáriu Jerál Crus Vermelja Timor-Leste (CVTL), Luis Pedro, hateten, projetu dada bee-moos antes ne’e CVTL hetan apoiu fundu hosi Governu Korea la konsege finaliza maibé apoiu hosi MOP ohin loron bele inaugura.
“Orsamentu ne’ebé ami hetan ba projetu ida-ne’e hahú iha tinan-2017 ne’ebé mai hosi Governu Korea to’o iha tinan 2019 ne’e projetu no orsamentu hotu. Maske projetu finaliza ona maibé projetu bee-moos seidauk hotu, entaun ami haruka proposta ba MOP apoiu fundu $36,000.00,” nia hateten.
Durante ne’e, MOP la’ós apoiu fundu hodi dada bee-moos ba komuniade la’ós iha suku Holpilat, maibé ba mós munisípiu sira hanesan Ainaro no Ermera, ho nune’e oinsa CVTL bele servisu ho komunidade implementa projetu ne’e durante fulan tolu ne’ebé finaliza iha dezembru realiza serimónia inaugurasaun iha janeiru.
“Bee-moos importante ba ema-hotu, ba komunidade vulneravél iha fatin sira-ne’ebé akontese dezastre bee-moos sai hanesan pontu importante. Ita ko’alia bee-moos sai hanesan direitu fundamentu ema hotu tenke asesu ba bee-moos bele hadi’a nia moris,” nia dehan.
Nune’e nia husu komunidade tenke kuidadu no halo manutensaun ba bee-moos, kuidadu kanu sira ne’e labele estragu karik husu sira-nia kontribuisaun orsamentu atu halo manutensaun ba bee-moos, nune’e labele depende de’it orsamentu hosi Governu.
Tanba, nia dehan, CVTL garante bee-moos bainhira tempu bailoron sei la maran maibé débitu bee-moos mak sei menus.
Xefi suku Holpilat, Emilio do Carmo Gusmão, hateten ohin bele inaugura projetu bee-moos tanba molok ne’e atu inaugura lori prosesu naruk, maske ukun an tinan 20-resin maibé komunidade sempre hakilar ba bee-moos.
“Haree ba jeografika, komunidade iha suku Holpilat hela iha área foho leten, entaun ita servisu hamutuk ho CVTL hodi identifika bee-moos hodi halo aproximasaun ho suku viziñu, xefe suku Altu Lebos hodi hetan duni nia rezultadu no ohin loron ita realiza serimónia inaugurasaun,” nia dehan.
Suku Holpilat kompostu hosi aldeia aldeia Hatu, Lela, Nainare, Manulor, Leogore no Fatuk-Oan ho nia totál populasaun hamutuk 2,7254.
Enkuantu CVTL implementa projetu dada bee-moos ne’e ba benefisiáriu hosi aldeia Lela ho Hatu hamutuk uma kain 134 ho totál populasaun hamutuk 617.
Jornalista : Celestina Teles
Editór : Cancio Ximenes
