DILI, 13 janeiru 2023 (TATOLI)—Partidu Kmanek Haburas Unidade Nasionál Timoroan (KHUNTO), realiza formasaun ba militante feto potensiál na’in-35 hosi munisípiu 13 tuir formasaun transformativu lideransa durante loron tolu ne’ebé hahú hosi sesta-domingu (13-15 janeiru 2023).
“Agradese feto partidu KHUNTO nian ho preparasaun di’ak tebes hodi kapasita feto maluk iha partidu laran oinsá prepara no transforma feto sir abele sai politiku ne’eb’e di’ak,” Konsilleiru Superiór Partidu KHUNTO, José dos Santos Naimori Bucar, hateten bainhira hala’o abertura formasaun ne’e iha sede partidu KHUNTO, Manleuna, sesta ne’e.
Liuhosi formasaun ne’e bele kapasita feto sira-nia koñesimentu bele kle’an no aprende liután oinsá transforma feto sira bele sai ema politiku ne’ebé di’ak iha partidu ida, atu nune’e feto sira bainhira iha loron ida karik partidu fó fiar ba lidera instituisaun Governu bele hatene nia lala’ok.
“Formasaun ne’e mós bele prepara feto sira bele partisipa iha Eleisaun Parlamentár ne’ebé sei mai ne’e,” nia dehan.
Prezidente Feto partidu KHUNTO, Odete Peloy, hateten formasaun ne’e ba reprezentasaun feto hosi munisípiu 13, ho objetivu atu hasa’e kapasidade feto nian oinsá sira bele ko’alia iha públiku no palku polítiku, tanba besik ona eleisaun parlamentár ne’ebé sei hala’o iha tinan ne’e.
“Nune’e, ami tenke prepara ami-nia feto maluk hodi bele kontribui mós iha eleisaun 2023. Formasaun ne’e mós sei apreende transformativu lideransa frto katak oinsá sai lidér polítiku ne’ebé di’ak hodi kontribui ba dezenvolvimentu,” nia hateten.
Aleinde, feto sira-ne’e sei apreende maneira ko’alia iha públiku hodi tun ba sira nia postu, suku no aldeia hodi fahe informasaun kona-ba polítika partidu KHUNTO nian ba militante sira kontribui apoiu partidu.
Iha formasaun ne’e sei kapasita feto sira oinsa bele hatene papél feto sira-nian liu-liu ba iha preparasaun fiskál ida-ne’e importante tebes tanba eleisaun parlamentár besik ona.
Entertantu, iha formasaun ne’e hetan apoiu hosi fasilitadór sira mai hosi Sekretária Estadu Igualidade (SEI) no NGO Caucus.
Jornalista : Nelson de Sousa
Editór : Cancio Ximenes
