VIQUEQUE, 14 janeiru 2023 (TATOLI)-Abitante Ue-Tasi, suku Bahalara Uain, postu adiministrativu Viqueque Vila, munisípiu Viqueque uma-kain 96 ezije Governu dada liña elétrika.
“Ha’u-nia komunidade suku Bahalara Uain kompostu husi aldeia neen, balu hela iha Bikarin no balu maka mai hela iha área Ue-Tasi, problema ne’ebé ita-nia populasaun sira enfrenta durante ne’e maka ahi eletrisidade. Ha’u ezije Governu no Eletrisidade Timor Leste (EDTL.E.P) bele tau ba perióridade atu populasaun sira-ne’e bele hetan ahi eletrisidade,” Xefe suku Bahalara uain, Jacques Paz F. L Pinto, hateten ba Agência Tatoli, hafoin autoridade no populasaun halo sorumutu ho Prezidente EDTL.E,P, iha area Ue-Tasi, sábadu ne’e.
Antes ne’e populasaun sira realiza enkontru ida hamutuk ho autoridade lokál hodi inísia tau osan hamutuk atu sosa fiu eletrisidade nian, dada ahi eletrisidade ba área Ue-tasi, tanba populasaun kauze uma-kain 96 hakarak asesu liña elétrika.
“Foin lalais ne’e, ha’u-nia komunidade realiza enkontru ho ha’u hakarak inisiativa rasik atu dada eletrisidade no uma-kain 96 prontu hotu ona atu tau osan hamutuk nune’e kada uma-ka’in ida oferese karau ida hodi fa’an maka sosa fiu, maibé iha momentu ba ha’u intervensaun katak buat dada ahi ne’e espíritu boot liu, ita koko hato’o took ba governante sira no ami mós halo pedidu ba EDTL.E,P munisípiu Viqueque hatutan ba nasionál,” nia akresenta.
Prezidente EDTL E.P, Paulo da Silva apresia ho abitante Bahalara Uain tanba hola parte iha prosesu dezenvolvimentu ne’ebé estadu no Governu halo katak la hein bainhira maka Governu lori mai, maibé hakarak kontribui ba prosesu dezenvolvimentu.
“Ha’u orgullu ho inisiativa populasaun sira-ne’e, liga ba preokupasaun populasuan Ue-Tasi nian ne’e sai mós programa perioridade VIII Governu nian. Aldeia sira-ne’ebé seidauk asesu ba ahi eletrisidade EDTL.E,P tau ona ba polítika eletrisdade komunitáriu,” nia katak.
Nia dehan, programa ida-ne’e responde ba komunidade sira-nia hela fatin distánsia kilómetru ida to’o kilómetru tolu sei la liu husi konkursu públiku.
“Nune’e ba área Ue-Tasi, ha’u simu ona proposta no ha’u orienta ona EDTL.E,P munisípiu Viqueque hodi tau ba perioridade no área Ue-Tasi sei tama ba eletrifikasaun komunitáriu, semana oin EDTL.E,P sei mai halo verifikasaun ba proposta ida-ne’e hosi Lalerek mutin to’o Ue-Tasi kilómetru tolu,” nia hateten.
“Tanba tinan naruk ona, ha’u hanoin populasaun sira la presiza atu hein tán. Tanba tinan 20 liu ona, depois ukun rasik an,” nia tenía.
Entretantu sorumutu entre populasaun Bahalarai ho Prezidente EDTL.E,P hetan partisipasaun hosi supervizór EDTL.E,P munisípiu Viqueque, autoridade lokál no populasaun suku Bahalara Uain.
Jornalista : Vitorino Lopes da Costa
Editór : Evaristo Soares Martins
