VIQUEQUE, 14 janeiru 2023 (TATOLI)-Prezidente Eletrisidade Timor Leste, Empreza Públika (EDTL.E,P), Paul da Silva, ofisializa loke ahi eletrisidade ba suku Ahic no Dilór, postu adiministrativu Lacluta, munisípiu Viqueque.
EDTL.E,P ofisialmente loke ahi eletrisidade ba suku rua ne’ebé iha postu Lacluta, inaugurasaun seidauk tanba agora prosesu instalasaun sei la’o.
“Ha’u fónobrigadu no parabéns ba inan aman sira iha suku rua, ha’u hanoin serbisu ida-ne’e knaar Governu nian ne’ebé Primeiru Ministru Taur Matan Ruak lidera, la haluha suku Ahic no Dilor kuaze tinan naruk hein ahi eletrisidade. Nune’e Primeiru Ministru orienta ami aselera dada ahi ba populasaun, tanba ne’e iha tinan kotuk ami hahú tau planu suku rua ne’e bele asesu”, Paul da Silva hateten ba Agência Tatoli, hafoin ramata loke ahi eletrisidade, iha suku Ahic, sábadu ne’e.
Nia akresenta, serbisu dada eletrisidade komlntribuisaun hosi ema hotu-hotu la’ós Governu, EDTL no empreza sira de’it, maibé serbisu konjunta liuliu apoia husi abitante hosi suku rua.
“Se la’ós populasaun sira-nia apoia ha’u hanoin ohin ita seidauk bele hatama ahi eletrisidade ba ita-boot sira-nia fatin. Tanba ne’e ahi lakan ona uza ba ho kuidadu no tau matan keta estraga, tau matan ba, labele kesi kuda ba arame ne’ebé dada ai rin eletrisidade nian, se estraga ita maka la asesu. Depois liu fulan ne’e tékniku sira sei mai fali hodi haree,” nia hato’o.
Iha fatin hanesan xefe suku Dilór, Jacinto Ximenes, agradese ba Governu ne’ebé dada ona eletrisidade ba abitante hosi suku rua nian tanba kuaze tinan naruk nian laran abitente sira la asesu eletrisidade.
“Hahú tinan 1975 to’o mai agora, loron 14 fulan janeiru 2023 maka foin ami-nia populasaun sira foin sente independénsia ida-ne’e. Tan ne’e, ha’u lori povu suku rua nian naran agradese ba esforsu ne’ebé prezidente EDTL.E,P halo, hodi populasaun sira asesu ahi eletrisidade. Iha ne’e uma-kain balun maka seidauk aalsesu hanoin ba oin EDTL.E,P bele tau matan mós sira-ne’ebé seidauk asesu,” nia akresenta.
Tuir dadus abitante hosi suku Dilór aldeia rua no suku Ahic aldeia tolu ho totál uma-kain 300-resin, maibé daudaun ne’e empreza responsável foin instala ahi ba uma-kain 100-resin no sei kontinua instala ba uma-kain sira-ne’ebé maka seidauk instala. Projetu dada eletrisidade ba sukua/ rua ne’e responsável hosi empreza Uaitau unip, LDA.
Iha serimónia halo lakan ahi eletrisidade ba suku rua ne’e realiza iha suku Ahic no akompaña hosi Presidente Autoridade Nasionál Eletrisidade, Institutu Públiku (ANE.I,P) no hetan partisipa husi autoridade lokál, Polísia Nasionál Timor Leste (PNTL) eskuadra Lacluta no komunidade hosi suku rua.
Jornalista: Vitorino Lopes da Costa
Editór : Evaristo Soares Martins
