DILI, 15 janeiru 2023 (TATOLI)-Governu Timor-Leste, liuhosi Sekretaria Estadu Formasaun Profisionál no Empregu (SEFOPE), domingu ne’e, entrega mate isin traballadór Korea Súl, Cândido Soares ba nia família hosi munisipíu Liquiçá iha aeroporto internasionál Nicolau Lobato, Comoro, Dili.
Mate-isin Cândido Soares refere mai ho aviaun Royal Bhutan Airlines, to’o iha aeroporto internasional Nicolau Lobato, Comoro, Dili, tuku 07.00 dadeersaan.
Matebian Cândido Soares lakon vida tanba hetan asidente tráfegu iha loron 01 janeiru 2023, matebian hahú hetan oportunidade ba serbisu iha Korea Súl iha 2014, ho durasaun kontratu durante tinan haat fulan sanulu, iha área peska.
Hafoin kontratu remata, matebian hetan oportunidade dala-rua ba serbisu iha Korea Súl iha loron 04 abril 2019 to’o hetan asidente no mate.
Iha serimónia simu mate-isin Cândido Soares ne’e, Sekretáriu Estadu Formasaun Profisionál no Empregu Alarico do Rosário, agradese ba Governu Korea Súl no parte hotu tanba iha kolaborasaun di’ak to’o ohin loron mate isin bele to’o mai ho di’ak.
“Ita hotu agradese tanba matebian nu’udar traballadór di’ak tanba nia hanesan koordenadór mobiliza kolega sira iha ne’eba fahe informasaun mai iha adidu, ha’u bele dehan nia mós eroi ida ba rai ida-ne’e, tanba sira eroi ba dezenvolvimentu ba rai ida-ne’e liuhosi sira-nia prosesu tomak tulun Governu iha parte balu,” Alarico do Rosário, hateten, iha aeroporto Comoro, Dili.
Iha Fatin hanesan, família matebian, Anacaleto Soares, lori família nia naran agradese ba Governu, tanba bele apoia malu ohin loron mate-isin bele to’o mai Timor-Leste.
“Ha’u lori família no matebian nian agradese ba Governu no matebian nia kolega sira iha Korea Súl, Timór no ne’ebé de’it agradese ba imi hotu nia apoiu ohin loron mate-isin to’o mai ho di’ak, nune’e lori mós matebian nia naran hato’o deskulpa ba imi hotu, karik matebian durante sei moris halo sala ruma hasoru imi,” nia dehan.
Jornalista : Arminda Fonseca
Editór : Evaristo Soares Martins
