Xefe suku husu MOP hadi’a estrada iha Holpilat
COVALIMA, 15 janeiru 2023 (TATOLI) – Xefi suku Holpilat, postu administrativu Maucatar, Emílio do Carmo Gusmão, husu Ministériu Obra Públika (MOP) atu hadia estrada ba komunidade, iha suku Holpilat.
“Ita ukun rasik aan tinan 20-resin ona, maibé ita haree, ita-nia estrada halo ita ulun moras uitoan, tanba estada aat nune’e ministru haree took hodi hadi’a estrada ba komunidade sira,” Emílio do Carmo Gusmão, hato’o preokupasaun ne’e iha aldeia Lela, suku Holpilat, postu administrativu Maucatar .
Ho kondisaun estrada ne’ebé aat, lideransa komunitária mós halo esforsu, hodi serbisu hamutuk ho kompañia no haruka proposta ba administrasaun munisipál.
Rezultadu hosi proposta ne’ebé hato’o direita ba Primeiru Ministru Taur Matan Ruak , kompañia halo de’it normalizasaun ba estrada, maibé bainhira tempu udan estrada kontinua aat.
Hatán ba preokupasaun ne’e, Ministru Obras Públika (MOP), Abel da Silva Pires, esplika, estrada aat la’ós iha Covalima de’it, inklui mós iha munisípiu sira seluk. Maibé atu hadia estrada tenke iha dezeñu di’ak no liuhusi prosesu.
“Ha’u husu ba inan aman sira pasiénsia, estrada hahú husi Bobonaro mai iha Alto Lebos, hosi Alto Lebos ba Fatululik to’o Tilomar dezeñu iha ona. Estrada Hosi Alto Lebos to’o iha suku Ogues loke konkursu públiku. Bainhira to’o ona iha ha’u-nia meza menitu ida rua. Hau asina maibe kuidadu iha pagamentu,” nia hateten.
Suku Holpilat iha-nia aldeia neen Mak hanesan Hatu, Lela, Nainare, Manulor, Leogore no Fatuk-oan, ho totál populasaun 2,7254.
Jornalista : Celestina Teles
Editór: Evaristo Soares Martins
